♥‏ فــضـــفـــضــه قــطــطــيـــه ♥‏

[بنت الجود]

هاااااااااااااي

انا عاجبني الموضوع بس مترردده بالمشاركه ..

انا يمكن فضفضتي حزييينه شوي ..

انا فضفضتي من النااس والقطط ..

تخيلوااا احنا نحب ققططنا تعتبر مثل اطفالنا ومسؤليتنا صححح !!؟

فتخيلوا يجيكم احد يقووولكم "لو قطتك ماتت "ايش تسوي ؟؟؟


بالله هذا سؤااااال تخيلوا يسااالونه من باب اني حريص عليك وابيك تكون واقعي


ياربي ببكي منهم

[الدلع]

السلام عليكم ورحمة الله وبركاته
في البداية رسالة للأخت العزيزة بنت الجود مع اعتذاري الشديد عن الدخول خط عرض :
هونيها وتهون محد خالي من الهموم والأحزان .. والمصاعب الي تواجه مقتني الحيوان بشكل عام والبسس بشكل خاص كثيرة وما تنعد ولا تنحصى ولولا تمسك الجميع بالصبر وثباتهم على مبدأ المحبة لما يقتنون كان ما لقيتي أحد ربى في بيته حيوان
نصيحة مني لك ولكل من يمر بنفس ظرفك : لا تتنازلوا عن ما تحبون إلا في حالة رفض الوالدين فقط وإلا فإن ما عداها من المصاعب محلولة بإذن الله
يكفيك أن تتجاهلي أي كلمات استفزازية تصدر من الغير وكأنها لم تصدر أصلا ولم تسمعيها وحطي أعصابك في الثلاجة ودربي نفسك على الصبر ثم الصبر ثم الصبر لأنك لن تجني من الشوك العنب
فضفضي وربك يحلها
موفقة اختي
ـــــــــــــــــــــــــــــــــــــــــــــــــــــــــــــــ
جبت معي اليوم موقف مع وحدة من بناتي :
الصغرى الله يصلحها عندها حركة نص كم ومستحيل ما تسويها كل يوم
والكبرى خوافة ما عندها جرأة تسويها بس تنتظر بسكات واستسلام حتى أجي وأحل الإشكال متى ما روقت
وجربت أصك عنها غرفتي واتركها برا لكن ما طاوعني قلبي وأنا أسمعها تمخش الباب ( افتحي لي يا ماما ) .. وأنا أجي هرولة وافتحه ما أقدر أقاوم
أكون أحيانا في عز النوم وعمتي تقوم تلعب ثم تجوع وأنا الي أتدبّس فيها ( ارسي لك على بر عمتك ولا بنتك ) بنتي في المحبة وعمتي يعني شايخة وتبغاني على كيفها
ما تفعله هو الآتي :
ترقى فوق جسمي مدري وش تحس فيه يمكن رايحة مصر وواصلة الجيزة وراقية الأهرامات
مرة صدري ومرة جنبي ومرة ظهري .. على حسب نومتي تجي وتطب وتطير النوم من عيوني ثم تجلس مثل ابو الهول وتطالع فيني برقة يعني قومي أكليني .. إذا ما عطيتها وجه تقرب شوي شوي الين توصل وجهي وتقعد تخرخر وتأرإر في اذني وأنا في بالي أقول اللهم طولك يا روح .. فإن كنت مروقة ومستعدة للقومة قمت وعطيتها أو اتجاهلها أبيها تنزل ولكنها مصرة فأغطي وجهي فتحاول يمين يسار ما في أمل فتضطر تنزل تلعب مع الكبرى أو تروح تنوم المسكينة الين أقوم وش اسوي فيني النوم
بسم الله الرحمن الرحيم .. ( حكينا في البس قام يعس ) .. هذا المثل من عندي .. والحقوق محفوظة وأحس انه جاي مضبوط لأن العسة عندنا في لهجتنا الدارجة نستخدمها في الليل والنهار وهي التفقد وبنتي ما قصرت تفقدتني ووجدتني أمارس هوايتي المفضلة في وقت الفراغ وهي دخول منتداي الحبيب ) .. الآن قامت من النوم وتبي أكل بس الحمد لله إني صاحية وما أتوقع أسلم منها في الليل .. ولما عجزت عن جسمي حاولت تنط جنب اللابتوب ــ متعودة كذا تلعب علي وتسوي نفسها مسالمة وإذا بها تنط على المفاتيح وطلعت لي واحد من فترة ( فداها المفاتيح وراعية المفاتيح ) وتقعد تلاحق سهم الماوس وشيل وحط حتى أطلع بسببها من المنتدى واسكر الجهاز وما تصدق تجلس عليه مثل ابو الهول أو تاخذ لها غفوة ــ .
لكن الآن معصي ولا يمكن لأنني لازلت أكتب الفضفضة وإن انحذفت قبل أن أعتمدها فربما أصاب بجلطة بعيد الشر عني وعن كل القارئين زوارا ومحبين ولهذا أشغلتها عني بالأكل والحمد لله سلمنا ذا المرة منها .
وبس خلصت .