تكفـون محتـاج ردودكــم ...

[صمت الأمل]

وعليكم السلام ورحمة اللهـ وبركاتهـ .


لاحول ولاقوة الا باللهـ ,, واللهـ قصتكـ مع الدجاج ومعاناتكـ معهم مؤلمهـ ..


لكن اللهـ يجزاكـ ألف خير أنت وعمكـ على حرصكم على صحة الدجاج واهتمامكم الشديد بها ..


طيب راح نجاوب على اسألتكـ كل واحد بعد الثاني ..


الدجاجهـ اللي كانت تبيض وذبحتها ,, كلام أخواني مصطفى وفواز صحيح .. فيها مرض الدمعهـ بسبب ضيق المكان .


لكن من قال ان المرض جاء من عندكـ ؟؟ المرض هذا أكيد الدجاجهـ أخذتهـ من القفص اللي اشتريت منهـ الدجاج اللي بالسوق . حسبي اللهـ على اهمالهم لهم بس ..


وعلاجها كان مضاد موجود عند البيطري مع العزل والفيتامينات .. لكن اللي صار صار .


والمفروض ماكان شريت ديكـ ثاني أو أخذت الديكـ اللي عند عمكـ ,, لأن احتمال اصابتهم بالمرض كانت عاليهـ .


حاليا عطهم بصل مفروم وشوي ثوم أو كراث او حتى حبهـ سوداء عشان تقوي مناعتهم ,, واذا كان عندهم مرض ولسى في بدايتهـ عشان يساعد المناعهـ عندهم . بس لاتعطيهم كثير .. ومرتين بالأسبوع يكفي .


والديكـ اللي يحاول يلقحها وترفض ,, هذا شيء طبيعي .. لأنهـ حاليا يحاول يسيطر عليها وهي ماتعرفهـ وخايفهـ منهـ .. لكن يومين بالكثير وراح تمشي امورهم عادي .


بيوت الخشب اللي عندكـ اذا هي تحتفظ بالحرارة وفي مكان بعيد عن تيارات الهواء فممتاز ..


اما اذا هي كبيرة جدا وتسمح الحرارة تروح بسرعهـ فأنا كنت آخذ قطعة فرش او زوليهـ قديمهـ وأبطن بها داخل البيت .


وأخيرا وليس آخرا ,, اتركهم حاليا وسوي اللي تقدر عليهـ .. عطهم البصل وأكل زين .. واللي يعيش ان شاء اللهـ تمام . واللي مايعيش اللهـ يخلف ..


لكن انتبهـ تجيب الدجاج اللي من المزرعهـ الثانيهـ وتضيفهم معهم ..


لأنهم حاليا يعتبرون في مرحلة خطر واحتمال كبير ينقلون العدوى للدجاج الجديد ..


إما تنتظر على دجاجكـ شهر أو شهرين عشان يبين المريض منهم أو اللي بصحهـ جيدهـ ,, بعدها تقدر تضيف معهم دجاج ثاني .


أو تتخلص من الدجاج اللي عندكـ وتعقم القفص والمكان ومشاربهم ,, وتجيب الدجاج اللي من المزرعهـ ..


أنت بالخيار .


ان شاء اللهـ أفدتكـ ,,


وأعتذر لكـ على التأخير في الرد .. لأني شفت سؤالكـ من أمس لكن ماشفتهـ الا على وقت نومي وماقدرت أرد ,, لاتزعل مني .


تحياتي لكـ .