كيف ابدأ مع الدجاج ... مع الحمام ..........

[صمت الأمل]

عدنا ..



وهالرد بخصوص تربية الحمام ..



الحمام راح يحتاج :



قفص واسع + قليل من التربهـ والصخور الصغيرهـ وكثير من الحشائش والأعشاب والأوراق أو أوراق النخل (( لأنهـ راح يبطن عشهـ بهـ )) + صندوق واحد لكل زوج + الأكل الحبوب المنوعهـ والخبز الجاف المكسر تكسير صغير والخضار والورقيات المقطعهـ تقطيع صغير أيضا + جيكتين ماء غير عميقة (( لأن الحمام يتروش بالماء عكس الدجاج اللي يتروش بالتراب )) + مكان مظلل وجزء منهـ مشمس .



الحمام يحب الأعشاش المرتفعهـ عن الأرض ,, وفيهـ بالسوق صناديق مخصصهـ لهم .



اذا كنت بالرياض فراح تلقى بسوق الحمام كل الأدوات المطلوبهـ لهم .



الحمام من الطيور السهلهـ في التربيهـ والتعامل معها .. وأليفهـ ومتطلباتها أقل من الدجاج .



اشتري لكـ الأنواع البلديهـ وراح تلاحظ إختلاف ألوانها وأحجامها .. إختر اللي يعجبكـ منها .



والأفضل تشتري بالغهـ والفرق بين الذكر والأنثى واضح بتصرفاتهم فقط .. أما بالشكل الخارجي فهم متشابهات جدا جدا .



اذا عندكـ أحد تعرفهـ عندهـ خبرة بترية الحمام والتمييز بينهم فروحوا سوا للسوق .



أما اذا انت لوحدكـ فإجلس عند قفص الحمام وراقبهم لفترهـ .



الذكر راح يكون عدواني شوي بتصرفاتهـ ,, أو يرقص أو يتهاوش مع الحمامات الأخرى , وتلاحظ إنتفاخ بسيط في الرقبهـ .



أما الأنثى فهي هادئة وحجمها أصغر بقليل ومافيها هالإنتفاخ . وماترقص أو تتناقر مع أحد .



خذ لكـ 3 ذكور و3 أناثي إذا المساحة عندكـ كافيهـ لهم ..



وعلق أعشاشهم فوق القفص , وممكن تضيف رف في جانب القفص أو اغصان كبيرة عشان يجلسوا عليها .



إنتاجهم سريع ومالهم موسم محدد ,, وينتجون بيضتين في التحضين الواحد .



وممكن ينجوا البسابيس (( صغار الحمام )) إثنينهم أو يعيش الكبير منهم .




والأفضل تفكـ العش وتشمسهـ وتنظفهـ بعد كل تفريخ عشان ماتكثر عندكـ الحشرات أو الباعوض ويجي البسابيس مرض الجدري أو أمراض أخرى .




اذا كبروا البسابيس وصارت ماتعتمد على أهلها في التغذيهـ ممكن تبيعها .



لأنكـ لسى مبتدئ فالأفضل تتعلم في البلدي وتعرف أمراضهم وتصرفاتهم .



عشان ماتتخسر فيهم وتشتري الغالي من الحمام ثم لاسمح اللهـ يموتون أو تتبهذل فيهم .



اذا أكتسبت الخبرة والثقهـ غير النوع البلدي لنوع أجمل ..



وهنا عاد يجي قسم هواة تربية الحمام واليمام في إعطائكـ نصائح افضل في الأنواع الأخرى .



لأني ماربيت غير الحمام البلدي .



إن شاء اللهـ ماطولت عليكـ وهذا اللي عندي في الحمام .. وفيهـ عندي علاجات لبعض أمراضهم .




تحياتي لكـ .