اقروا سالفتي... وشرط تضحكون

[kuwaitia]

السلام عليكم


يبت لكم سالفه تموت من الضحك صارت لنا انا واختي

طبعا قطوتنا بيكي الدلوعه غنيه عن التعريف ههههه...واختي دايما مناشبتني عليها

قبل جم يوم وديتها الدهماء عشان تطعيمها... واختي قعدت تفتر بسوق الحمام مع ابوي... عاد لقت قطوه عجبتها وايد خاصه وان لونها لون اختي المفضل >>> رمادي

ومع المكاسر عطاها اياها بسعر لقطه... وحلف لها ان قيمتها اكبر من جذي وانها مو مريضه وانها خوش قطوة ...الخ...

وطبعا اختي ما شاء الله عليها محد يغلبها بالحنه تفخت راس ابوي الا ابي هالقطوة.. وابوي ما كان عاجبه ياخذها لان اللي يبيعونها صغار وشكلهم مومهتمين فيها ((شكلها قطوة شوارع )).. وخذاها فره تشوف المحلات عشان تغير رايها بس صممت الا تبيها.. ومن الحنه واللويه >> ابوي بيفتك منها خذاها من غير فحص بس بيفتك من حنه اختي... حتى ما شيك عليها ولا طلعها من القفص

المهم صار لهم جم يوم مع بعض مو متوالمين ولا متفاهمين .. بيكي تنحاش والقطوة اليديده (( سميناها اوبرا)) تلاحقها وتجابلها وبيكي كله خايفه منها ومنخشه وكله تبخ بويها من تقرب منها

عاد اليوم وديتها الدهماء عشان اطلع لها كرت ولا المفاجاه العظمى














عطيتها الدكتور قلتله افحصها لي.. جان يقولي قصدج افحصه

ولا طلعت القطوة ذكر خخخخخخخ

و بعد الفحص طلع مريض وعليه ... قمل باذونه وفطريات بجلده تخلي شعره يحت ويحتاج على الاقل شهر علاج و يبيله عزل طول فترة العلاج .. وفوق كل هذا قيمه ادويته تساوي سعره تقريبا خخخخ ... والباط جبدي انه قال تبون تعالجونه ولا تسرحونه... صراحه انا خفت فاتصت على ابوي وقلتله وحط حرته باختي مسيجينه ..فكسرت خاطري اختي مع دموعها وقررت اني اعالجه

عاد حطيته بالسرداب مع ادويته والليتر بوكس ماله .. ادعوله الله يشفيه >> نسيت اقولكم صار اسمه زعتر ... فديته زعتور


لا تروحون سالفتنا ما خلصت خخخخ


الحين بيكي تدور على زعتر وتطلع اصوات تبيه ... بعد ما قعدت يومين تبخ بويهه... عاد ما حبته الا بعد ما طلع مريض هههه

وردت اختي تناجرني على بيكي مرة ثانية

شرايكم مو قصه كوميديه