مغــامرتي في تدريب الدره النيباليه alexander وبـعض أساسيات التدريب

[فارس مجهول]

بسم الله الرحمن الرحيم



بعد شهور مضــت وانقطاع عن كتابة المواضيع حبيت

اتكلم عن تجربتي في تدريب نوع من أنواع الببغاوات الى وهو

الدره النيباليه هالطير أول مره اقتنيه في حياتي

تعرفت من خلال هالتجربه على جانب من سلوكياته و شخصيته والاهم تدريبه

طبعا في الفتره اللي فاتت اقتنيت طائرين أول مره كان الطير ماهو أليف أو شبه اليف

والمره الأخيره والحاليه طائر اليف تمام وفرخ , الطير الاول عمره كان في حدود السنتين

أول ماشفته أمام عيني عجبني مظهره وحجمه والطير أحلى حاجه رغم انه ماهو اليف الا أنه مايخاف

وهذي ميزه مو سهله أنها تنوجد في الدرر سواء النيباليه او الهنديه , في البدايه أول ماوصل

المحروس للبيت فتحت له القفص ومباشره طلع ,طبعا الطير عضاض من الدرجه الاولى صح مايخاف بس

كان يعض من خارج القفص ومن داخله ,جبت القفاز وعصا خشب في البدايه حطيتها امام صدره انجبر انه

يطلع على العصى وحطيت القفاز امام صدره وطلع وكررتها اكثر من مره يتنقل مابين القفاز والعصا

وفي هالفتره كان الطير كل شوي يطلع ويهرب ,انتهى اليوم الاول , ورجعته القفص واليوم الثاني

هو يوم التدريب الفعلي , قبل ماكمل ,,ملاحظه هامه مع الطيور عامه والدره خاصه الطير لما يشوفك

تخاف , لما يجي يعضك او ترتبك راح يكرر هالفعل اكثر من مره لانه نجح في ابعادك لازم الواحد

يتحمل العض ,لانك لما تفرض شخصيتك على الطائر خلاص راح يخضع لك لانه مالقى طريقه تبعدك عنه ,

بعد هالملاحظه او المعلومه الطويله العريضه نرجع نستكمل أحداث اليوم الثاني طبعا

الطير طلعته مره ثانيه من القفص وكنت شوي مجوعه وكنت اعطيه الحب الشمسي ياخذه ويرميه

اول مره مديت يدي ومعاي الاكل اخذه من يدي لكن بعنف ورماه والمره الثاني خف اندفاعه

وشوي شوي عرف ان اليد ماراح تأذيه بدى ياخذه بهدوء ويرميه في هالخطوه لاتيأس مصيره راح ياكل

خلصنا من هالخطوه ننتقل , للخطوه الاخرى للمعلوميه فترة التدريب راح تختلف من طير لآخر

على حسب تجاوب الطير معاك ,اليوم اللي قبل كنت اطلعه على القفاز ويهرب المره هذي

غامرت بدون قفاز وبدون عصى , مديت اصبعي وعلى طول هاجمني وعضني لاكن لما مديت ساعدي

عض عضه خفيفه وطلع على يدي وخليته ينتقل لساعدي الثاني وكررت هالخطوه اكثر من مره

وبعدين مديت اصابع يدي وهو على ساعدي طلع عليها جلس اقل من دقيقه وهرب , كالعاده

رحت وهو في الارض لما مديت اصابعي عضني وتحملت عضته وطلع وصرت لما اخليه على يدي

اكبس على اصابع رجله عشان مايهرب ضغط مايأثر على الطير وهو على يدي وماسك رجله

رحت اتمشى انا والحبيب من مكان لاخر طبعا هو يحاول يهرب حتى يعض اصبعي عشان افك

رجله لاكن تحملت وهو مع الوقت انصاع لامر الوقوف على اليد فصرت كل ماطلعه على يدي

يحاول يعض بخفيف ثم يطلع وماعاد يهرب تعود على الوضع طبعا بدون ماكبس على رجله


وعدت الايام وانا اطبق معه هالطرق والحمدلله بالنسبه للطلوع على اليد تم بنجاح باقي المشكله

الاهم هي , العض طبعا تلاحظون في بعض الطيور اللي ممكن تكون اليفه لكن داخل القفص عدوانيه

طبعا تختلف من طير لاخر فيه طيور الوضع عادي عندها وفيه طيور تحس انك تعتدي عليها , لان القفص

هو المكان الآمن بالنسبه له , طبعا صار كل مايعض اصبعي قبل ماعطيه الاصبع احط فيه شوية عسل

فصار مره يلعق العسل ومره يعض عضه خفيفه , وانتهينا من مشكلتنا المؤرقه العض , لكن داخل

القفص هي المشكله وزي ماذكرت سابقا هذا طبع عند الطائر فهو خارج القفص صار اليف معي ومع الغريب

بعد مانتهت فصول تجربتنا اكتشفت ان الدره النيباليه من اروع الببغاوات

وشخصيتها وكبريائها اعجبني , بالاضافه الى انها بعد انت تصبح اليفه

تماما راح تتعلق في صاحبها , كثير , بالنسبه للتغذيه فهي من افضل الطيور

اللي تتقبل اغلب الانواع من الاطعمه ولاتمانع , طائر متكلم جيد وبهلواني رائع فالطير اللي عندي

كان يقلد رقصة المكاو , دون ماعلمه ,الدره او الكسندرين لما تشوفك مع كل عضه راح تخاف

راح تستمر على هالنهج , وفي نهاية تجربتي المتواضعه,أحب أوضح ان اهم حاجه

في تدريب الدرر خاصه والطيور عامه الصبر لان الواحد راح يمر بمراحل صعبه من عض وخوف

لازم نصبر على كل المشاكل اللي راح تواجهنا والنتيجه امام اعينكم , الان راح نستعرض

لكم بعض الصور للحبيب ميزو بعد تدريبه , وركزوا عمره فوق السنتين يعني مافيه شي مستحيل

أول يـــــوم ..


ثــــاني يوم ..




في الأخير أتمنى الموضوع ينال على أعجابكم , واعذروني على الاطاله

حبيت اذكر ادق التفاصيل عشان يكون الموضوع واضح للكل ..

بكل الود فارس مجهـــول ..