وطار طيري وعقلي سفح معه

[سنايديه]

السلام عليكم ورحمة الله وبركاته

كيفكم اخوتي وبعد انقطاع طويل كنت ناويه ارجع ومعي مواضيع شيقه لطيري

العزيز الامزوني البلوفرنتد

لكن اليوم حصلي موقف والحمد الله على كل حال

والله اكتبلكم وانا في قمة الروعه والحزن قد يظن البعض اني ابالغ لكن

من شدة الحسره قلت خل اخواني يشاركوني الموقف الي مر علي


انا اشريت طير وباذن الله كان بكمل معي سنه كامله وكنت ناويه اكتب تجربتي معه

وصبري معه لحتى وصولي للنتيجه المرغوبه بعد التدريب

في الفتره الطويله هذي تعلقت في الطير تعلق شديد جدا للاسف

لدرجة صار ينام وياكل ويشاركني يومي كله من النشاطات حتى لدرجة

الاهل تعودو عليه و حبوه خصوصا الوالده من شهر تقريبا بدا تعلقه هو ايضا فيها وتعلقها فيه هو بعد


الطير صاريفقدنا لو نصد عنه شوي بس ينادي ويصيح يشاركنا جميع لحظاتنا حتى احنا

تعلقنا فيه صار شديد جدا

حساااااااااس جدا ذكييييي جدا يحب الناس تعودت عليه لدرجه جنونيه وقد تكون مرضيه للاسف

يعني الزبده صار جزء من حياتي سبحان الله لدرجة حتا الطير صار يقلد صوتي ويفهمني

اذا صرت معصبه ولا زعلانه ولا مبسوطه مع المود دايم

ما احب احد يصرخ عليه ولا يقوله شي اي مكان انتقل له فتره معينه حتى رجوعي للبيت اخذه

مستحيل اخليه مدلع دلع الله لايوركم


ما امن عليه احد يعني وش اقولكم والله ندري بس صاير مثل التوام


انا ادري انه طير بس هذا الي صار

والي صار اليوم


انه الجو كان حلو وااسف فيه رياح ما تسلطت الا اليوم اطلع والعبه برا

دايم احطه على شبك الغسيل يلعب فيه عمره ماطار خواااف مايحب يطير يتعلق في ثيابي

يبي يدخل جوا بس هذا طيري والي متعوده عليه منه

اليوم ويا ليتني ماطلعت ولا طلعته رحت مثل العاده وحطيته على عروة العربيه

من الغبا والدلاخه والحماره الي فيني مامنه موب طاير

والله ماطريت الا الي مسفح في الهوا وانا دايم ارده بيدي بس هاالمره خليته احسبه بوقع في

الارض بس الاخ ها المره صار طموح ورتفع وارتفع وارتفع وطار فوق جدار المخزن

انا هناااااا في حلم ليس على ارض الواقع ابدا احتري احد يصحيني بس


ابي مسكه يعلي اكثر لين اختفى فوق الغرفه انا هنا لاتعليق كان فيني عقل كاااان

بس راح مدري وش قلت مدري وش حكيت مدري وش سويت


امي تروح وتجي تهديني تقوا بيرجع بس انا في قمت الانهيار العصبي صراخ صياح باختصار

انجنيت

خلالالاص اتذكره اتذكر كلللل يومياتي معه مستحيل راح لالالالالا وين يروح مستحيل


طيري راح الغالي راح من خذاه بيعيش ولا بيموت اتصلت على اخوي مثل المجنونه

ابيه يجي يدوره في الحاره ولا يشقح الغرفه ويشوف هو فوق ولا


امي ماصبرت الله يخليها ويطول بعمرها عن عشر رجال لبست عباتها وطلعت تدوره في الارض الي جنبنا


اخوي تاخر انا هنا انجن زياده معد صبر لبست عباتي وجبت السلم مع اني عمري مارقت فوق

طاوله بس خلالالالالاص ابرقا السلم واطمر الجدار(سبيدر مان على غفله ) معد همني الناس

يضحكون يستغربون بالطقاااااق الي يطقهم طق


وديت قفصه في الحوش الي جنب الغرفه الي وقع فوقها

وانا ابرقا السلم تذكرت كلام الوالد لي يابنتي قصيه قصيه قصيه

وانا اعااااااااااند لالالالالا ابطيره ابعلمه الطيران بس الهياط الي ما ل امه داعي ماله داعي

وللاسف معلمته الطيران وفعلا تعلمه تقريبا بس ما بعد ضبطه

قمت اوسوس بعض الناس طب عليهم الطير بينكرون وجوده عندهم خصوصا ها الايام

الضمير معدوووم عند البشر انقهرت وين بيروح في الشوارع والله يا بعض الناس

بحسبونه حماممه وبيطبخونه ويتغدون عليه

كل هذا في مخي وادعي العزيز الجبار يرجعه لي


توني على اول درجه في السلم الا امي تناديني . يا....... يا.......

انا من نبرة امي حسيت انه فيه شي يبشر لقيت امي داخله هي واخوي الله يخليهم لي

وامي حاطه طيري في عباتها خامته ومغطيته كتمت ابوه خافت يطير ثانيه


امي واخوي انكسر خاطرهم علي بس ماسكين انفسهم

مسكت طيري وقسم صحت صياح والله لو ابوي ولا امي ميتين وانا ودي اطق نفسي طق

على عنادي وثقتي الزايده في الطير والله جاني قلبه منفظخ من الروعه


الوالده وهي تدور على الطير قابلها اخوي وهو جاي وطبعا الي ساعدنا بعد ان طيري له اسم

اناديه به فكانو ينادونه بسمه ولمحه اخوي الله يوفقه تحت احد السيارات

وقام يناديه بس امي قالت امسكه وامزع ابوه وجبه بنتي انهبلت

صار التسلب طاير المساحه ذي كلها الخسيس

وكنت اول اربط شريطه في يدي وارطها في حجله عشان اذا ابعد اسحبه

بس اليوم مدري وش فيني ثقه زايده وعباطه تنوح

المهم الحمد الله والشكر له ربي قدر ولطف والله اني اشوف القفص ومو مصدقه انه عليه


اسمع صوته ومو مصدقه انه صوته والله بقدرة قاااادر رجوعه سبحان الله شلون لقوه اهلي مدري

سبحان الله سبحان الله سبحان الله

والف الحمد والشكر له سبحانه

رحت على طول وجبت المقص اشوى ماجبت المكينه وقصيته حلت حلت

مدري وش قصيت بس قلت تووووبه خلاص بلا طيران بلا هم

الى الان الروعه فيني واحس بتانيب ضمير بسبب ثقتي الزايده فيه

هذا الي صار اليوم وقلت لازم اكتب لخواني في توزو عن معاناتي اليوم

معليش كلام ملخبط موب مرتب سامحوني ما في تركيز ابدا

وسلامتكم