ببغائي فيه زارررررررررررررر

[ضمير مستتر]

ببغائي فيه زاررر
من فتره طويله وببغائي صاير يلعب في الحمام لأن حمامي حوسه وكله خرابيط ومرايات واشياء تلمع وشكل الرطوبه الي فيه عاجبته
المهم إن الأخ مطيح فيه 24 مايطلع الا عشان ياكل ويرجع للحمام مره ثانيه وفي الليل ينام على سله الغسيل وطبعا مايحتاج اقول لكم شكل الحمام كيف صاير .. صاير مقبره وكم من مره روعني في الليل وأنا رايحه للحمام .. فجأه ما تدري الا هو يطل من ورى الستاره .. وعينك ما تشوف إلا النور .
المهم جى مره يتلحوس عندي وأنا اطالع تيمون وبومبا وخلصت الحلقه وجت الاغنيه الي في النهايه ثم قام يستنزل .. ويرقص بيديه ورجليه بعنف شديد وانا مندهشه من المشهد وخلصت الاغنيه وطاح مغشي عليه .. وصحى مره ثانيه وراح , وانا جاني حول من الضحك عليه
ومرت الايام مادريت عنها وما حطيت الموقف الي مر في بالي بس صار حادث اكد لي ان فيه مشكله ..
رن جوال اختي والببغاء يطعس على المساند ..فجأه .. إنتفض وصار يرقص بجنون وبعدين يطيح ويقوم يترنح .. شافه اخوي وقال وهو متعجب \ وش .. ؟ اقسم بالله انه مهستر .. الظاهر فيه زار ههههه
عاد انا صدقت قلت في نفسي عسى ماجاه شي وهو فالحمام .. هاه .. وشو .. أي والله هم مايحبون احد يزعجهم في الليل والي عندي ما يتسلط إلا المغرب والساعه 12 ,, يصفر ويصارخ وينادي الشغاله ثم يسبها لا وطالع لنا هالأيام بطلعه جديده صاير يقلد صوت المكنسه!! يعني عليه العوض .. اكيد مطفرهم
المهم انا ماعاد واطنته ولا صرت اقرب منه .. بس للأسف حالته تزداد سوء

وبعد ايام رحت للمطبخ اشرب مويه وهو وراي .. وقلد صوت ابوي واعتقدت ان الجني الي فيه تكلم .. وجتني ام الركب ولا عاد دريت ويني فيه وابي اتحرك ماعاد قدرت وابي اصرخ ما قدرت وحسيت ان الدم الي في اطرافي يرجع لورى .. آخر مامعي جلست على الارض وغمضت عيوني وجلست اصيح .. وهو بكل برود رقى الطاوله وراح لصحن الفواكه وجلس يعضعض في تفاحه و يسولف معها !!!!! ( والله إن قلبه أسود)

بعد المهزله الي صارت قررت اني ابحث عن الحل بشكل جدي وقريت كل شي يخص سلوك الببغاء الرمادي بس مالقيت حل لغايه مافتحت موقع عن علم نفس الحيوان و قريت عن حالته إلي حسب ما يقولون مشهوره مثل الإكتئاب عندنا ويقول ان الببغاءات نزاعه للصوت العالي وتكيف عليه ويختلف المقياس من ببغاء للثاني يعني فيه ببغاءات تسلطن على محمد عبده وفيه ببغاءات ما يجيب راسها إلا إلا زعاق شاكيرا ويعود الإختلاف لعوامل بيولوجيه عند الببغاء يوم كان فرخ وهالعوامل هي الرطوبه ودرجاتها !!! يعني كل مكانت درجات الحراره مناسبه كل ماكان الببغاء رومنسي وهادي وكل ما زادت او قلت طلع الببغاء عربجي وبثر
والسبب الثاني هو ان الببغاء يحاول يكون قريب منك بس انت تبعده عنك .. يعني خايف على الثوب الي توه مغسول او الكراسي الجديده والرفض الي يلاقيه الببغاء منك يتعب نفسيته ويخليه يفكر يحوز على اهتمامك فتره اطول حتى لو يضر نفسه ويبالغ في أي تصرف يعجبك (وانا والله احب الرقص) وقال لو تدري ايش إنت بالنسبه لببغاءك كان ما عاملته بهالجفوه ابدا .. وفعلا انا لاحظت ان الببغاء كائن محب فعلا
وسكرت الكمبيوتر وجلست افكر شوي بعدين دخل علي وهو خايف مني لأني صايره ابعد عنه كل ما قرب مني بس هالمره جلست وانا مبتسمه وتعلق في كم البلوزه ورقى لكتفي وقف شوي وبدء يلمس شعري بهدووووووووووء وطول اليوم ما نزل عن كتفي مع اني اتحرك كثير إكتشفت ان عنده جفاف عاطفي وحسيت بتأنيب الضمير لاني خليته يوصل لهالمرحله من الإضطرابات النفسيه إلي ممكن تأثر على صحته مع اني كان ممكن اتجنبها بحركات بسيطه بس مؤثره ارجوكم لا تخلون طيوركم تحس بألم الحب من طرف واحد العبو معهم شيلوهم خدو بخاطرهم تصير حياتهم افضل ويخلصون في حبكم اكثر



ضمير مستتر