سؤال عن قطي

[شوشو مشاكس]

بصراحة ماكنت مفكر اني اعقمه كنت ناوي بصراحة اجيب له انثى علشان التزاوج ونا إن شاء الله قادر على تربيتهم علشان كذا سألتك ايش أفضل شي ينفع له ونهائياً والله ماجت على بالي أني اتاجر بالقطط والذكر اللي عندي الحين والله لو ياصل إلى 5 الآف مافرطت فيه خلاص تعود على وصار مطيع ويسمع الكلام وهو إجتماعي وهادي الطبع مع الناس بس وقت اللعب ابعد عنه ماشاء الله عليه شقردي يحب اللعب بأي وقت وقيسي على كذا الأنثى وحتى الكيتنز ذاك الوقت لو تكاثرو راح أكيد ما راح اعطيهم أي احد إلا شخص هاوي تربيتهم وعنده الخبرة الكافية بالتعامل معهم ايش رايك بكلامي هل تؤيديني أو لا من واقع تجربة لأني اقولك بصراحة راح ادخل المرحلة الثانية وهي جلب الأنثى وذا الحين خلاص ماعاد اصكر عليه الغرفة هي ليلتين والحين خلاص زي أول...

[Octopus]

انا اويدك والصراحة انا لي تجارب احب الناس ان يستفيدو و يتعلموا منها اتذكر قططي قلت ل نفسي اعطيهم لناس يربوهم و لكن قلت في نفسي اعتني فيهم لان كل القطط التي اربيها من سنة 1999حتى الحين يعني حافظت على نسل جدهم الأكبر اقصد قطي ليو علما بأن هناك صور جديدة بتكون حصرية لمنتدى 2توزو ب أنزلها قريبا

[شوشو مشاكس]

السلام عليكم
بصراحة ما اخفيكم لاحظت على قطي من يومين بعض التصرفات كان مايسويها من قبل يطلع كثير للحوش أول عادي دايم باب المدخل مفتوح ولايفكر انه يطلع وكنت اعاقبه وذا الحين احس انه تمرد.....قل أكله عن أول بعد ماكان ياكل كثير ماشاء الله عليه......وبعد الملاحظة اللي حيرتني كثير انه يجلس بالساعات بعيد عني احس ان قطي يحب يجلس لحاله هو مافيه أي شي أو مرض حرارته بوله أو برازه أكرمكم الله كل شي طبيعي ولا إستفراغ ولا إسهال حتى أكله ماغيرته هو اللي متعود عليه وآخرتها قبل شوي عطيته وجبته المفضلة دجاج مسلوق مع شوية جزر اكل شوي وراح..طبعاً أكله منوع لاكن وجبة العشاء تكون دسمة شوي يعني يحب يختفي عن الأنظار هو ما كان كذا أول ولافيه أي شي تغير بالبيت واللي صك راسي بعد قبل ليلتين تبول برا الليتر بنصف متر أول مره اشوف بوله خارج الصندوق بالله هذا مايخش العقل كلنا نعرف أن القط نظيف مايسويها إلا بالليتر عمره تقريباً مابين ال 8 و9 اشهر....انتم وش رايكم يلزم اوديه للطبيب او لا ؟ مع ملاحظة اني ما اشوف فيه اي شي وشكرا.

[بسبس مياو]

لسبب بسيط جدا وهو اننا لانعلم الغيب...بالنسبة لي مستحيل اتسبب في ولادة قطط في بيتي وبكل برود اوزعهم على ناس تربي او هاوية
بكل تأكيد مشكل المربين والهواة كويسين فما راح احط في ذمتي ...وش الفايدة اصلا
احب البسس اجيبلي قطة او قطتين وكفاية والله يقدرنا نربيهم بما يرضي الله وماناخذ ذنب من وراهم

انا اكلمك لاني اشوف لقدام وش نتيجة هالتكاثر ..ودامك مو تاجر ولا مستفيد من التكاثر اتمنى تعقمه وتتبنى انثى معقمة يتسلون سوا
هذا رأيي ..ادري كلامي حاليا يمكن غير مقنع لك لكن صدقني هو الصح
انت قلت انك ما اح تعطيهم الا لناس تحب البسس وتربيهم...يعني ماراح تحتفظ فيهم...انا زي ماقلتلك مر علي بلاوي من الناس اللي تربي وتتبنى وتشتري قطط بالاسم بس بحبون القطط ...انت ما راح تتاجر فيهم بس اللي بياخذهم منك حيتاجر وممكن يهملهم وممكن يمرضوا ولا يعالجهم ممكن وممكن ......طيب ليش كل هذا

انت حر

[شوشو مشاكس]

والله العظيم انكم حيرتوني من البارح افكر وإلى الآن ما ستقريت على رأي محدد على العموم ضروري جداً اجيب أنثى علشان القطو اللي عندي ينشغل وقت الدوام معها لاكن سالفة التعقيم ماجت على البال لعل في الأمر خيره انا بفكر هاليومين وبداية الدوامات اعلمكي على ايش استقريت والخيره فيما اختاره الله

[بسبس مياو]

السمك مرة بالاسبوع
الدجاج المقلي او المشوي المهم يكون صدر وتغسله شوي من البهارات
المعلبات كثرتها تتعب معدته...ابتعد عن وسكاس ...شيبا وفانسي افضل وبعدهم فرسكس....شخصيا ما احب اكل الهايبر ماركتس في معلبات افضل بالعيادات والمحلات المحترمة الخاصة بالحيوانات زي كات لايف و ابلاوز و شيزر

[شوشو مشاكس]

يووووووووووووه تصدقين بالله من ضمن الأغراض اللي اشتريتها ويسكاس مو معلبات على شكل قصدير مقوى وعليها صورة قط شكلتله من دجاج ولحم بقري واونصة الدجاج وشي مخلوط وتونا مشوي وبعد سمك المحيط ومن أمس وهو ماشاء الله ياكل لما قريت مكوناتها لقيتها جداً مناسبة للقطط الصغيرة وحتى يقولون من كيسين ل 3 مرات للقطط الصغيرة يعني وجبات والباقي من شركة ثانية هل اخلط معهن شي على السريع اقصد مع الويسكاس وشكراً

[Octopus]

الويكاس بجميع أنواعه مرفوض ما ننصحه لانه يسب مشاكل ك الاسهال و تساقط الشعر وغيرها الأفضل تشتري له دري فرود

[شوشو مشاكس]

السلام عليكم
البارح قلت لنفسي ليه ما احمي قطي لأني بصراحة شفت من تحت رجوله سواد من كثر المشي على السيراميك والحوش وقت تغيير الجو قلت الله يعيني على العض والمخوش على يدي لأني بصراحة قبل 4 شهور تقريباً حصلت معركة بيني وبينه ومطاقق أول مره أحميه ونا تعودت نجلس انا وياه قريب من المغاسل علشان اخليه يتعود على صوت الماء لاكن البارح ماتوقعت يكون راضخ للأمر الواقع وهو حاس اني بحميه وهنا حصلت المفاجأة بالنسبة لي تصدقون أو شي فتحت المويه خليته على الدافي وبيدي مسحت على ضهره قلت تمام مافيه أي مقاومة هو حاول مره وحدة يهرب لاكن مسكته بحنان وقمت اردد بعض الكلمات اللي هو متعود عليها والحمد لله صار واقف جوا الطشت حتى ماسمعت غير مره وحدة يماوي على خفيف شكله يقول اخلص علينا الدنيا برد هههههه تقريباً 10 دقائق أحميه وطول الفتره الماضيه لما ابغى احميه اوديه للمركز ينظفونه ويقلمون اظافره اذا حبيت أنا مدة ساعة ب 40 ريال ذا الحين خلاص عرفنا الطريقة زين..اليوم وديته للدكتور للكشف عليه هو مايعاني من أي شي لاكن كإحتراز سألني عن التطعيمات قلت كلها تمام وهو اللي معطيه الحقن من قبل وسألني عن تطعيمة الديدان قلت لا والله ما أخذها هنا احترت انتم ايش رايكم هل هي ضرورية جداً حقت الديدان هو صحته ما شاء الله تمام التمان ولا يشكو من أي شي يعني هو طبيعي وبعديت كلنا عارفين ان القطط ذات الشعر الكثيف والطويل لما يسوي الليتر بوكس احياناً يلزق شي بسيط وهو ريحته اعوذ بالله لما يجي بجنبك من اسبوع اشتريت مناديل تشيز من الصيدلية البشرية معطره بدون كحول هل هو يضر بجسمه أو فروة شعره وشكراً

[بسبس مياو]

برأيي اي بيطري يقولك ابرة ديدان هذا مستهتر بأرواح الحيوانات..يعني تاخذ قطاوتك وماعاد ترجعله
مافي شي اسمه ابرة ديدان للقطط
هذي ابرة ايفوماك (ايفرمكتين) يعطونها للمواشي والابقار
1مل لكل 50 كيلو من وزن الحيوان....متخيل 1مل لبقرة وزنها 50 كيلو!!!
اجل القطة اللي وزنها 3 او 4 كيلو كم جرعتها !!!جرعتها ماتنقاس حتى بالمل ..يعني مش حتى نقطة ..حاجة كذا ماتقدر تشوفها بالعين ..فكيف يخاطر ويحقن القطة فيها
الابرة هذي محرمة دوليا استخدامها للقطط وللكلاب الصغيرة
وياما صارت مآسي لقطط مرت علينا هنا بالمنتدى وبرا المنتدى بسبب هالابرة الرخيصة
وحتى لو قلنا ان بالصدفة ماحصل شي للقطة فهذا مجرد حظ وياتصيب ياتخيب
اغلب ومعظم القطط اجسامها لاتتقبل حتى الجرعة الصحيحة ..لان في شي في اجسام الحيوانات اسمه ناقل كيميائي لما تدخل الجرعة في الجسم الناقل هذا بمنعها تروح للجهاز العصبي
بس... اغلب القطط عندها حساسية منه وجسمها يفتقر لهالناقل فلما تاخذ الجرعة مافي شي يمنع وصولها للجهاز العصبي
فمثل ما الجرعة تتسبب في شلل الديدان تسوي نفس الشي مع القطط.فتبدأ علاملت التسمم اتساع حدقة العين رعشة،شلل ،افرازات من الفم ورغاوي،تباطؤ دقات القلب ترنح،توقف التنفس ..وموت
يعني البيطري المستهتر لو حتى بمعجزة ظبط الجرعة الدقيقة هو اساسا مايدري اذا جسم القطوة يتحسس من الابرة او لا!!!
بعدين ليش المخاطرة!!!
الطب سوا حبوب خاصة للقطط امنة عليها ليش يستخدم ابرة!!! على فكرة سعر 1سم ايفرمكتين 5 ريال وهو حيعطيها 0.2 مخففة وعالبركة

حبوب الديدان مهمة حتى لو القط مافيه ديدان ...المفروض ياخذها طول عمره ..كل شهرين اذا مابلغ سنة...وبعد مايصير عمره سنة ياخذها كل 4او 6شهور
الحبوب اسمها درونتال اشتريها من اي محل حيوانات محترم او عيادة بيطرية وهي امنة ومفعولها ممتاز....
وعلى فكرة جرعة الديدان تعطي مناعة لجسم القط

المناديل مافيها مشكلة دام بدون كحول بس لاتكثر استخدامها لان القط يلعقها..الافضل تقص السعر اللي من ورا اريح لك وله وانظف كمان