قصينا الجناح وما شفنا خير

[kfsh]

السلام عليكم

اخواني الأفاضل انا لسه مبتدىء شريت كوكتيل منذ ثلاثة اسابيع وكنت متابع لاكثر المواضيع المختلفه عنه بهذا المنتدى المبدع الي بصراحه ترتاح وانت تقرأ مواضيعه مالكم بطول السالفه

المهم قلت يا ولد الحين حاول انك تدرب طيرك بنفسك وتعلمه حبه حبه ... وديته يوم الخميس الماضي للمحل الي اشتريته منه علشان لا العب فيه (عط الخباز خبزه) وبعد ما وصلنا للبيت قلت يا ولد اليوم ما عندك شغل والشباب لسه بدري عليهم .. وانا الي استفرد به بغرفه لحالنا واجيب قفازات ثقيله علشان ما يعض لانه عض راعي المحل وجرحه .. مسكته وهو يصرخ وصرت امسج على راسه مره من فوق ومره من الخلف ومره المس منقاره يمكن لمدة ( 5 - 7) دقايق قلت علشان يتعود ويالفني وهو ما غير يصرخ ويعض بالقفازات رجعته للقفص ولاحظت انه يلهث كاني لاحقه .. قلت يمكن من الرهبه !!

جيت له من بكره (الجمعه) وكل ما اقرب عليه يقعد يصرخ يصوت منخفض شكله حاااااااقد علي حتى لو المس القفص مع العلم انا وزوجتي مهتمين به من ناحية النظافه والأكل واولادي ما يسوون له شي وصار ما ياكل الا الحبوب الصغيره وقام ونتف ريشتين من جناحه اليمين قدامي كانه يقول لي خذ الريش انت ووجهك ما ابيه بصراحه ضاق صدري من جد على الحركه الى سواها وصار ما يصفر ولا يلعب.

يوم السبت بالمساء لاحظت انه يتحرك بشكل سريع على المجثم ذهابا وايابا وهو يمط رقبته للأعلى بدون تصفير وحتى الأكل ما ياكل غير الحبوب الغامقه الصغيره وما ياكل حب دوار الشمس

مع انه قبل عملية القص كان وش حليله واذا قربت عليه يطير من الفرحه!!!


اسف اذا طولت عليكم ولكن حبيت اقدم الموضوع بشكل شامل وواضح حتى ان تبين لكم حجم المشكله الي انا واقع فيها..... والشكرالموفور مقدماً لكم