وداعاً قمور ..

[smile eye]

بسم الله الرحمن الرحيم

السلام عليكم ..

في الصباح ؛ الساعة مايقارب الخامسة والنصف هامسترتي قمور داعسه حالها على باب القفص تبغى تطلع .. فتحت الباب طلعت قمور وجلس ألعب معاها .. حملتها رحنا جلسنا على الحاسب نتصفح منتدى 2zoo قمور الشيطونة تتنطط وتركب على الكيبورد .. وطبعاً في نفس الوقت كنت أكلم صاحبتي بالمسن شوي و فتحنا الكام عشان صاحبتي تبغى تشوف قمور .. شافتها وقامت قمور تسوي حركات كانت تجنن .. وهـ فديتها , بعدين كان بجانبي كرتون فارغ حطيت قمور فيه لأني كنت مشغولة قامت تحوم و تدور و تسوي حركات.. شوي ما أشوفها إلا توقف و تطالع فيني حسيت أنها مسجونة تبغى تطلع رجعت حملتها .. حطيتها عليَ قامت تحوم و تتنطط .. المهم بعد ما يقارب ساعة و شوي حسيت بالتعب سجلت خروج و طفيت الجهاز .. حملت قمور وحطيتها في قفصها قامت تاكل بعدين تكورت على نفسها و نامت .. بعد كذا أنا ركبت غرفتي برتاح ماحسيت بنفسي و نمت من التعب .. جلست الساعة 2 و نص الظهر .. أووه فاتتني الصلاة قمت طيران على الحمام غسلت أسناني و توضيت ورحت أصلي و أنا ألبس احرامي حق الصلاة ماشفت إلا الباب ينفتح بقوة على طول راح نظري على الباب شفت أخوي الصغنون يقول لي هامسترتك ماتت أمي طلعتها بره أنا إنفجت بشكل مو طبيعي تعوذت من بليس و صليت خلصت صلاة تمشطت و لبست عباتي .. عشان بروح المعهد .. طبعاً تفكيري كله كان في قمور من الصدمة أصلا ما صدقت .. سحبت شنطتي و نزلت بسرعة طالعت على المكان الي أحط فيه قمور مالقيت شي .. رحت عند الباب شفت امي توها داخلة قالت لي ماتت خلاص طلعت بره شفت قمور ماسكة في باب القفص بأسنانها و ماتتحرك قربت جنبها لمستها كانت تتنفس دخلتها داخل وقلت لأمي ماما قمور ما ماتت تتنفس قامت امي تقول لي لا يتخيل لك ماتت شوي و أمي شافتها تتنفس و تفتح و تغمض حركتها أمي عن زاوية القفص شفتها تحتظر بعيوني كانت تعور القلب قربت جنبها المشربة نزل لها ماء بس ما قدرت تشرب خلاص أنا ماتحملت تباعدت عنها وجلست أبكي مو متصورة أن أعز صديقاتي بترحل و بتتركني بعد ما حبيتها و تعلقت فيها .. امي قالت لي داهي تودعك .. رحت أخذ شوزي أكرمكم الله .. تأخر الوقت السواق ماوصل كلها دقيقتين وأسمع صوت الباص طلعت بره وأنا أبكي و امي طلعت وياي طلعت قمور من القفص على قطعة كرتون كانت بعدها تحتظر قلت لأمي لو أقولك شي تضحكي علي قالت لي وشو قولي قلت لها لو أقول لكم تودوها بيطري ما ترضوا تقولوا خلاص بتموت .. قالت لي امي في وين البيطري قلت لها والله ما ماتت تتنفس .. خلاص ما تحملت وجلست أبكي بعدين طلعت وركبت الباص كانت بنت خالي في الباص قالت لي غناتي وشو فيش قلت لها هامسترتي بتموت خلاص تحتظر قامت تهديني وقالت لي لا ما بتموت بيودوها بيطري .. وطول الطريق كنت أبكي .. وصلنا المعهد كنت مره زعلانة واول ما وصلت كلمت امي قلت لها وش صار قالت لي خلاص ماتت قمت ابكي وسكرت الموبايل بسرعة .. أنا كنت مستغربة كثير لأن قمور كانت تلعب وتدور الصباح مافيها شي وما كانت مريضة حتى الكل لما قلت لهم إستغربوا ..


وداعاً قمور

تركتني في هذه الدنيا وحيدة كانت مبعث الأمل في نفسي .. أحبك قمور أحبك لن أنساك أبداً
كانت تستقبلني بفرح كل صباح تودعني عند ذهابي للمدرسة .. الآن أنا فقدت جزء كبير من حياتي .. مع العلم أنها لم تعش مع لمدة طويلة فقد 4 أشهر لكني أحببتها وأصبحت أعز صديقاتي .. الكل كان يكرها لأنها في نظرهم أنها فأر ما عدا أختي لأن قمور هدية منها و بنت خالي و أخوتي الصغار .. كل من يصف الهامستر بأنه فأر فهو إنسان متخلف ناقص العقل ..

فـ نقول وداعاً أيضاً لحلم تربية الهامستر .. والدتي هددتني بشراء الهامستر لأنها تكرهه .. ولو ما قمور جات لي هدية .. كنت مستحيل بحصل على هامستر ..

دمتمـ بسلامـ

أدري إني هدرت واجد .. بس لأني حزينة على فراق قمور

أختكمـ *( smile eye )*