ديدان ، إلحقونى

[نوديوس]

مشاكل القطط كترت، و أنا تعبت
المهم، القطة اللى كانت رافضة تاكل، الدكتورة قالت عندها برد، و بتاخد خافض مع مضاد حيوى، ربنا يشفيها،
المشكلة بقى:
أنا عندى 3 قطط إتنين منهم أخدوا جرعة فلوفيرمال و هياخدوا جرعة تانية بعد 3 أيام، و كنت إتفقت مع الدكتورة إنى هدى للقط الجديد اللى ما أخدش لما أبتدى أديلهم الجرعة التانية
المشكلة إنى مستضيفة قط بتاع واحدة صاحبتى من يوم الخميس اللى فات و قاعد عندى 10 أيام بصراحة تعبنى تعبنى، بيعض القطط، و يقوموا تانى يوم مش قادرين يدوسوا على رجلهم، النهاردة لاحظت إن عنده إسهال قلت أشوف البراز بتاعه المهم دخل الليتر بوكس و شيلته قبل ما يدفن البراز لقيت فى ديدان حية فى البراز، طبعا كلهم بيقوموا بالإخراج فى نفس الليتر بوكس ، قلقانة جدا على قططى، و بعدين هو هيمشى يوم الأحد أستنى لما يمشى و بعدين أديلهم الجرعة التانية من الدوا، أنا مش هينفع أوديه للدكتور و لا أديله علاج عشان صاحبته ممكن ترفض عشان هى متابعة مع دكتور و مش بتخالف كلامه خالص
المشكلة فى قططى هما أصغر منه و خايفة عليهم، و خايفة العلاج يكون صعب لأنه ممكن تجيلهم عدوى و هما أخدوا الجرعة الأولى بس من الفلوفيرمال، و الصغير خالص اللى لسة جايباه ده مش ناقص أصلا و ما أخدش دوا ديدان قبل كدة