دومينيك بدأ ياكل واااايد ....شسوي فيدوني

[Dominique]

السلام عليكم..
آنه عضوة جديدة بالمنتدى وماسجلت إلا لما شفت انكم تفيدون الكل بصراحة..

مشكلتي في قطي شهر سبتمبر القادم راح يكمل سنة.. وآنه عندي اياه من 4 شهور تقريبا.. من مدة شهر ونص سويتله اخصاء ( قطي ذكر ) . هو من قبل الاخصاء ماياكل إلا البسكويت الخاص بالقطط نوع ديليكات, ويسكاس وحتى شريتله نوع باونس بالنكهات المختلفة، وكل ماحاولت اوكله شي ثاني مايرضى حتى اني جوعته لمدة 7 ساعات ولما حطيتله المعلبات ماكله الا لمه دنيت يمه البسكويت. اقترح علي الطبيب اني اخلط البسكويت مع المعلبات علشان ما يحس بالفرق مرة وحدة لأن كثرة البسكويت تسبب حصوة ، جربت هالطريقة وهم ما نفع. قالولي لما تسويله اخصاء يسمن. سويت الاخصاء وبعد هو على حاله. بس من فترة اسبوع لاحظته اني لما اكون بالمطبخ يقعد عند رجلي ويطالعني بنظرة استعطاف, قلت خلني اجرب معاه يمكن ياكل، عطيته كبداية حبتين ربيان وللعجب... اكلهم . بعدين بدا شوي شوي ياكل دجاج مشوي أو مسلوق بس ما يحب شي فيه بهارات. وضل على هالحال كل ما نبي نتغدى يقعد عند الباب وينتظر احد يعطف عليه ويرميله شي.. قل اشتريله معلبات كذا نوع وأجرب اللي يعجبه وللصدمة عجبوه كلهم كانوا من نوع fancy feast with turkey, beef,chicken , وقمت اشتريله وهالكلام من يومين, هو العادة ياكل من طبخ البيت او المعلبات على الغداء بس وباقي اليوم ياكل بسكويت, بس هاليومين صاير يبي كل الوجبات معلبات فطور وغدا وعشا وبين الوجبات صرت ما ألحق معاه ، أمس خلص 4 معلبات من نوعين مختلفين واليوم 2 ونص علبة كبيرة من نوعين مختلفين وصار يقضي حاجته عدة مرات باليوم أكثر من قبل, آنه خايفة يصير فيه اسهال وانتوا بكرامه من كثر ما ياكل أو تنفجر معدته. آنه بصراحة مستغربه منه لأن مرة وحدة عشق المعلبات بشكل مو طبيعي بمعدل انه كل ما يخلص وجبة بنص ساعة يلحقني طلبا للمزيد.
انتوا مرت عليكم هالحالة ؟؟؟؟؟

طولت عليكم.. شكرا

[فطوم]

اختي حسب علمي ان القطط بعد عمليه الأخصاء يحدث معها نفس الشي فتأكل كثيرا وتسمن بشكل ملحوظ..
ولااعتقد انه يوجد علاج سوى ان تعوديه على وجبات معينه في مواعيد معينه حتى لايسمن ويمرض...

بختصار لاتدعيه يأكل طوال الوقت حدديله كميه معينه من الوجبات التي تغذيه دون أن تزيد عن حاجته..

إنشاء الله مع الوقت يتعود وتصغر معدته ويعود كالسابق

[Dominique]

مشكورة فطوم على الرد، بس آنه مابيه يرجع مثل أول لأن ماكان ياكل إلا بسكويت بس من الظهر اليوم ما عطيته شي ليلحين وبحاول أخليه يجوع لحد المغرب وبعدين بعطيه من العلبة
يعطيج العافية على الرد

[فطوم]

اختي انتي تقصدين انه اول كان ضعيف وايد

دام شهيته مفتوحه انشالله بياكل وبيصير جسمه طبيعي لا نحيل ولا سمين

بس انتي نظميله وجباته لكن التجويع قد يزيد الطين بله...

دامج معطيته الظهر عطيه العصر شوي....

وأهم شي انج تبدين معاه بالتدريج...

وحاولي تلهينه وتلعبينه بألعاب القطط ...

[Dominique]

انشالله بنظمله الوجبات.. بس يكسر خاطري لما يطالعني.. عيونه تينن جنه بيبي..
مشكورة على العموم وما قصرتي

[فطوم]

اي اختي كلنا جذي شنسوي بعد
انا قطوي نفس حالت قطوج ماياكل شي الا بسكوت صارله 3 سنين اجوعه اسويله اي شي اخلطله مستحيل ياكل غير البسكوت واتمنى يسمن

بس اهم شي صحته

[قطو_Q8te]

[دومينيك]
حياج الله بينه اختيـ..
بخصوص عملية التخصيهـ ..
رح تشوفين قطوج ياكل بشكل رهيب عجيب وراح يمتن حيل وينام وايد بعد

انتي حاولي تعطينه ثلاث وجبات باليوم بس
واذا جاع حطيله ماي
مومشكله الدراي فود والاكل المعلب
حاولي تعطينه حبتين مرتديلا يحبونها القطاوه حيلـ..
الهيه عن الاكل
كوريله ورق خل يركض يلعب
او بليت الليزر
او بالخيط خل ينطـ..
بخصوص الربيان والدياي عادي كله اكل ومفيد بعد
وعموما" القطط المخصيه رح تلجأ للحس الاجياس ويمكن حتى الجواتي .. ليش مادري
عالعموم انتي قوليلنا تجربتج بعد عملية الاخصاء بعد شهر شهرين ثلاث خنشوف اذا راح يمتن ولالا
اذا مامتن بسوي حق قطوي " بسبوس "

[Dominique]

بالنسبة حق بسبوس سوله اخصاء.. لأن دومينيك صار friendly بشكل ما تتصوره أهو من الأول لما أكون نايمة ( ينام معاي بالغرفة طبعا ) يلصق شواربه بخدي أو ينام على مخدتي معاي وإذا حس بالملل يزعجني بصوته علشان أقوم... بس ما كان يخليني أحطه بحضني أو أشيله وايد، لاكن من عقب العمليه دايركت صار عادي إذا شافوه البيت نايم بحضني أو لاحقني وين ما أروح.. إذا شايف بامبينو من برنامج الوادي.. هذا بامبينو مستنسخ...
نصيحة لا تتردد بالاخصاء بس آنه اللي مخوفني انه ضل فترة من بعد العملية على نفس عاداته الغذائية بس من يومين صار جنه مفجوع بس يبي ياكل.
انشالله يمتن اتمنى يصير مدربح واااااو بيصير ثقيل بطووووووط

[قطو_Q8te]

لوووووووووووولـ.
بسبوس بعد يسوي جذي ويا امي
ايي يقعدها بايده يدزها ويبوسها ويعض شعرها وينام يمي ويم امي ويركض ورانا :d
والله شكلي بسويلهـ
بس رفيجي مسوي عملية اخصاء حق قطوه بس متين حيل شكله موحلو
انتي سويتيها بالدهماء ب15؟؟

[Dominique]

آنه سويتها بالدهماء ب 18 مو 15 وسبحته بنفس اليوم بالدهماء قبل العملية لأن يأذيني بالبيت يصير معافر بالبانيو ... توكل على الله ولا تأجل