مشكلة بخصوص تفريخ الافريقي

[3obd]

السلام عليكم ورحمة الله وبركاته
كيف حالكم انشاءالله كويسين
انا عندي مشكلة
ولد اختي الله يهديه ورطني
تدرون ايش سوا؟
انا كنت جايب زوج افريقي وحشي انثى وذكر على اساس اولفهم والحمدلله نوعا ما ولفو على بعض ولهم حوالي شهر ونص وحاطهم بالبيت
قلت على بال ما اخلص القفص يكونو ولفو على بعض
المهم وذاك اليوم كنت قاعد اسوي العش وازبط فيه واقصقص الخشب
جا الملقوف ولد اختي
وسألني :
خالو ايش هذا ؟
قلتله:
هذا بيت للبغبغانات .
قال:
واللي هما قاعدين فيه ؟
قلتله:
هذا مؤقت ولمن اوديهم القفص الكبير لازم احط هذا البيت عشان لو يبغو يحطو بيض يقدرو يحطوه هنا .
قال:
تديني بيضة ؟
قلتله : طيــــــــب .
المهم خلصت العش وطلعت من البيت .
ويوم رجعت لقيت الاخ فك قفص البغبغانات وحط العش قدام الباب والبغبغانات جوة العش
وناديته قلتله ليش تسوي كذا
ما رد وبعد شوية راح يبكي
ضربني وبكى سبقني واشتكى
المهم ذحين الطيرين في العش وما يخرجون مررررة الا الذكر يخرج شوية وياكل واول ما يشوف احد قرب يخش بسررعة العش .
والانثى ما طلعت ابدا .
حاولت اخرجهم ما فيه فايدة خفت استخدم القوة معاهم يتعقدو من العش ويعتبروه مكان مهو آآآمن لهم
ولهم على هذي الحالة اربعة ايام
وعلى فكرة رميت شوية فصفص في العش بعد شوية لقيته ماكول كله
الله يخلييكم قولولي ايش اسوي ترى انا خايف على الانثى لا تموت من الجوع والعطش.
وجزاكم الله خير الجزاء
وصلى الله على سيدنا محمد وعلى آله وصحبه وسلم