كيف تعلم طائرك بعض الحركات الحلوة والممتعة

[3obd]

السلام عليكم ورحمة الله وبركاته
كيف حالكم كويسين
اليوم ابغى اعلمكم شوية حركات حلوة ومفيدة وانشاء الله تعجبكم
في البداية في بعض القواعد لازم نتخذها عندما نود تدريب الببغاء وهي:
1- الصبر وعدم العجلة وما نعصب على الطير او نرفع صوتنا ولازم نكون مبتسمين على طول صدقوني ترى الطير يتاثر بالحاجات هذي وكلكم عارفين.
2- انا افضل انه الطير يكون على الاستاند ! بتقولولي ليييش؟ بقلكم ليش
الطير لما يكون في القفص يكون محصور في منطقة محددة وهذا يزيد من نسبة الخوف والرهبة لدى الطير خصوصا الطيور اللي مازالت تحت الترويض والصغيرة لانك لو جربت ودخلت يدك في القفص الطير لو كان يخاف ولو بنسبة بسيطة تلاقيه يرجع ورا او ينزل تحت المجثم او يتعلق في سقف القفص وهذي الامور تدل على عدم ارتياحية الطير
لكن لما يكون الطير على الاستاند يحس بامان اكثر تعرفون ليش لانه بامكانه الطيران والهرب على عكس القفص لذلك الطير يعرف انه لمن حيخاف بامكانه يهرب بسهولة وهذا مهم .
3- لازم تكون غرفة التدريب هادية واضاءتها جيدة وعدم وجود اي أي طائر آخر.
4- لازم يكون الطير ايجابي معاك وعشان كذا اول ما تطلعه على الاستاند قرب وجهك من وجهه واقعد اتكلم معاه بصوت هاديء واديه شوية اكل وطالع فيه وهوه ياكل ومره جيب راسك من اليمين ومرة من الشمال خليك على هذا الحال الى ان تحس انه الطير اتطمنلك بعض الطيور تاخذ وقت لكن بعضها ثلاث دقايق ممكن تكفيه.
طيب الامور اللي تكلمنا عنها هذي اساسيات قبل كل تدريب يعني عامة
ذحين نبدأ بالحركات اللي قلتلكم عليها
1 - علم طيرك يسلم
تبدأ بالاساسيات اللي تكلمنا عنها, بعدين اول شي تقول للطير سلام عليكم وتمسك رجله وتقوله شـاطر وتديه الاكل اللي يحبه عبارة عن جائزة وتعيد الحركة كذا مرة بعد شوية حاول انك ترفع رجله في يدك وتمسكها وهنا انبهكم الطير اذا سحب رجله لا تشده بالعكس قله شاطر واديه جائزة
وكرر الي سويته الى ان تحس انه الطير ما يسحب رجله بعد كذا
حتلاقي الطير كل ما تقله سلام عليكم حيخليك تمسك رجله وترفعها طبعا مسألة الوقت تعتمد على الطائر نفسه وسرعة تعلمه وفهمه
أخر شي قله سلام عليكم بس خلي يدك بعيده شوية عن رجله حتلاقيه يرفع رجله وينزلها واذا ما رفعها حاول بعدما تقله سلام عليكم انك تدق رجله وتبعد يدك شوية حيرفع رجله انشاء الله
وشوية شوية تبعد يدك عنه زياده وبعدين اذا رفع رجله حاول تمسكه بشويش بس لا تخوف الطير زي ما قلتلكم اذا شفت الطير سحب رجله سيبها لا ترعبه ومع التدريب حتلاقي بمجرد ما تقول سلام عليكم وترفع يدك حيرفع يده هوه كمان طبعا حاول انك لمن تخش عليه في اي وقت انك تقوله سلام عليكم وترفع يدك بعد كذا نبه على كل من يمر على الطير انه يسلم ويرفع يده وترى هذي امور متقدمه بعدالتدريب الاول وتراها ما تاخذ وقت .
التدريب هذا اخذ مع طيري حوالي 30-40 دقيقة.
2- علم طيرك الالوان .
وهذي الحركة يبغالها صبر وفيه حاجة لازم يكون الطير يعرفها وهي كلمة (لا) ويعرف معناها وهذي الكلمة لازم اذا قلتها ترفع صوتك شوية عشان يفهم انها تنبيه له وهذي سهله يعني كل ماجا الطير يسوي حاجة غلط او يعضك او شي قله لا وانا انصح انه كلمة لا وشاطر تكون من اول الكلمات اللي الطير يعرف معناها لانها تريحكم كثيييييير جدا اثناء التدريب
طيب نبدأ بالحركة
اول شي جيب اي حاجتين ملونة ومايكون في شي يجذب الانتباه فيها غير اللون تمام .
وانا دايما افضل اللونين الاخضر والاصفر لانها وحسب تجربتي من اسهل الالوان تعلما لدى الطيور
طيب اول شي ادي الطير الجائزه وخليه ياكلها ويخلص بعدين وريه اللون الاخضر وقله بصوت عالي وواضح اخضر وخليه يعضه بس مو يعضه يعني بمجرد ما يلمس منقاره اللون قله شاااااطر واعطيه جائزه
وخليه يخلص وكرر العملية الى ان تحس انه صار يفهم وحاول كل شوية تبعد اللون عنه شوية عشان يلحقه ويعضه وبعد ما تكرر العملية من عشرين لثلاثين مرة تقريبا يكون الطير تعلم اللون الاخضر وعرف ايش معناه.
طيب بعد ما تخلص من الاخضر عيد نفس الحركات مع الاصفر وبنفس الطريقة الى ان تحس انه فهم كلمة اصفر وعرف معناها بعد كذا خلي الطير يريح شوية لمدة 3 دقايق وارجع راجع معاه الاخضر وبعدها بشويه الاصفر طبعا كل لون لحال ولاتلخبط الطير مثلا يكون وانته تتكلم معاه عن الاصفر يكون الاخضر موجود او انه الطير شايفه في يدك الثانية
طيب ولما تبدل بين الالوان وانته تعلمه حاول تديه ظهرك وغير اللون يعني زي ما قلنا لا تخليه يشوفك ويتلخبط ترى مشكلة وعمره ماراح يتعلم زي الناس.

طيب ذحين بعد ما تراجع معاه ريح وخليه يريح شوية
وطلعله اللونين وامسكها في يد وحدة وخليها متباعده عن بعض وقرب عند الطير وخلي بعد اللونين عن راسه متساوية يعني ما يكون لون اقرب من لون وقله مثلا اخضر واستنى عليه حتلاقيه ساكت ويفكر ويقلب راسه وبعدكذا يحاول يقرب من اللون ويعضه انته من يوم ما يعضه قله شاااااااطر واديه جائزة
وسوي نفس الشي مع الاصفر خلي المسافة بين الطير واللونين متساوية لانه لو ما كانت متساوية الطير بيروح للاقرب وقله اصفر شوية ويعض الاصفر وقله شاااطر واديه جائزة
وبعدكذا حاول تكرر العمليه اكثر من مرة
بعدين بدل مكان الالوان ولاتخلي الطير يشوفك وجرب معاه ثاني مررة
حتلاقي الطير يسويها صح واعيد واكرر لاتهمل كلمة شاااطر بصوت مرتفع مع الجائزة بعد كل حركة صحيحة
من الممكن انه الطير يلخبط وتقله اصفر يروح اخضر او العكس عشان كذا تلاقي الطير لما يجي عند اللون يجي بشوييش فانته لو شفته صح خليه يكمل لكن لو كان غلط قله بصوت عالي لا لا لا لا وعيد له اسم اللون اللي انته كنت تبغاه يعضه وانشاء الله حيوقف ويروح للون الصح وترى الطير يحتاج لمراجعه يعني حاول كل يومين ثلاثه تعيد الحركة معاه وتلعب معاه شوية ولو اتقنها مية بالمية بعد وقت يعني من 3 اسابيع الى شهر ممكن تدخل لون ثالث ورابع وخامس وسادس وسابع حتى لو تبغى علبة تلاوين كاملة بس اهم شي ما تدخل لون الى ان يكون اتقن اللي قبله وراجعته مع البقية وانصح انك ما توريه الالوان المتشابهه ودرجات الالوان نفسها يعني حاول تكون الوان سهل التمييز بينها هذي الحركة اخذت معايه في طيري عشان يعرف اللونين بس ساعة تقريبا وانا ما اقول كذا عشان اوريكم اني محترف او اني فاهم لا والله ولكن عشان تعرفو انه الطيور هذي ذكية وتعليمها سهل بس لازم من الصبر.
وانشاء الله راح اجيب لكم في موضوع ثاني عما قريب جداا ان احيانا الله
كيف تعلم طيرك انه يحط الكورة في السلة و حركات غيرها كمان .
وصلى الله على سيدنا محمد وعلى آله وصحبه وسلم
آآسف على التقصير كنت بحط صور ولكن للاسف الصور كلها والمقاطع بالهاردسك والهاردسك انسرق وانا قاعد ادور علىالـ backup وانشاءالله القاهـ
وخلينا نشوف الردرد

[عديل الروح]

مشكور وماقصرت ننتضر الجديد

[very smart]

ماشاء الله
موضوع جميل وسرد اجمل للموضوع
وانشاء الله يحقق الفائده المرجوه
تقبل مروري

[عاشق الببغاء 2]

بادئ ذى البدئ اشكرك على ترتيبك للموضوع وتوصيل الفكرة بحيث يكون اقرب للعملى وهذا يتطلب فهم الفكرة وتوصيلها بشكل يسهل على الجميع التدريب والتنظيم بعملية التدريب
والموضوع جيد ومنتظرين منك المزيد................................. أنشاء الله تعالى
يسرنى دوما وجود من لديهم من خبرات عملية وتوصيل الفكرة لنا ليكون التدريب أفضل ونصل للمستوى المطلوب
شكرا مرة
سرنى التعرف عليك

[طير سارة]

المشاركة الأصلية كتبت بواسطة 3obd

السلام عليكم ورحمة الله وبركاته
.
4- لازم يكون الطير ايجابي معاك وعشان كذا اول ما تطلعه على الاستاند قرب وجهك من وجهه واقعد اتكلم معاه بصوت هاديء واديه شوية اكل وطالع فيه وهوه ياكل ومره جيب راسك من اليمين ومرة من الشمال خليك على هذا الحال الى ان تحس انه الطير اتطمنلك بعض الطيور تاخذ وقت لكن بعضها ثلاث دقايق ممكن تكفيه.

انا القفص عندى مفتوح على طول والطير ( كاسيكو ) ماخذ راحته واغلب الوقت يكون على سطح القفص وعلشاني مدلعه للآخر هم حاط له اغصون اشجار فوق القفص و غصن ثاني على جانب القفص
واذا كان الطير فوق مستحيل اقدر اقرب منه ويتهرب مني على هالاغصان والمكشله انها كثيرة هذا غير وجود اربع حواف للقفص من الاعلى يستخدمهم كأستندات
علشان كذا ما يثبت في مكان وهذا اللي محيرني
وما يدخل القفص في النهار الا نادر وآخر الليل يدخل لينام وهي اطول مدة يقضيها بالقفص

رايك و رأي الاخوان اهل الخبرة

ايش ممكن اسوى معاه
1 / ازيل الاغصان و بلاش ادلعه
2 / اقفل عليه القفص وما افتحه له الا وقت ما ابغي
3 / اغير القفص
هدفي الاول والخير اني اقدر اسيطر عليه

تحياتي

[3obd]

أول شي شكرا للاخوان عديل الروح والاخ very smart والاخ عاشق الببغاء 2 وطير سارة
الذين اتحفونا بمرورهم

ثاني شي بالنسبة للسؤال السابق
ممكن ابعاد الطير عن القفص نهائيا يعني مثلا تحط الطير في مكان ما فيه الا الاستاند بس وتبعد القفص الثاني

وبما ان الطير يتهرب هذا يعني انه الطير غير مهيأ للتدريب وبكذا ما نكون استفدنا حاجة والطير بكذا يعتبر سلبي عشان كذا انا قلت لازم نحطه في مكان هاديء واضاءة جيدة ومايكون فيه اي شي يشغلة
وحتى ايضا فيه بعض الطيور اذا ما لقي شي يشغل نفسه فيه يروح ياكل هذا كله من طرق تجاهل الببغاء
عشان كذا البعض يحاول يبعد ايضا اواني الاكل والماء .
وترى انتبهو هذا الحركة ما تنفذ الا مع الطيور اللي تتهرب بالاكل لانه بعض الاحيان يكون لها وقع سلبي على الطائر
وانشاءالله اكون افدت والبركة في باقي خبراء موقعنا الغالي

وصلى الله على سيدنا محمد وعلى آله وصحبه وسلم

[AL-MOHANDES]

مشكور على الطرق في تعليم الببغاء للحركات .,,.
وجهد تشكر عليه ..

[طير سارة]

المشاركة الأصلية كتبت بواسطة 3obd

أول شي شكرا للاخوان عديل الروح والاخ very smart والاخ عاشق الببغاء 2 وطير سارة
الذين اتحفونا بمرورهم

ثاني شي بالنسبة للسؤال السابق
ممكن ابعاد الطير عن القفص نهائيا يعني مثلا تحط الطير في مكان ما فيه الا الاستاند بس وتبعد القفص الثاني

وبما ان الطير يتهرب هذا يعني انه الطير غير مهيأ للتدريب وبكذا ما نكون استفدنا حاجة والطير بكذا يعتبر سلبي عشان كذا انا قلت لازم نحطه في مكان هاديء واضاءة جيدة ومايكون فيه اي شي يشغلة
وحتى ايضا فيه بعض الطيور اذا ما لقي شي يشغل نفسه فيه يروح ياكل هذا كله من طرق تجاهل الببغاء
عشان كذا البعض يحاول يبعد ايضا اواني الاكل والماء .
وترى انتبهو هذا الحركة ما تنفذ الا مع الطيور اللي تتهرب بالاكل لانه بعض الاحيان يكون لها وقع سلبي على الطائر
وانشاءالله اكون افدت والبركة في باقي خبراء موقعنا الغالي

وصلى الله على سيدنا محمد وعلى آله وصحبه وسلم

صار لازم اغير القفص وهذه حلها بسيط و موجود عندي وابعد عنه الاغصان

تسلم على الرد وما قصرت و الله يعطيك العافية

تحياتي

[الاسطورة]

ما شاء الله طريقة كتابتك للموضوع روعه والموضوع جداً جميل

[الاسطورة]

ما شاء الله طريقة كتابتك للموضوع روعه والموضوع جداً جميل