[Dominique]

السلام عليكم أخوي

بالنسبة حق الطوق آنه مثلك عديته مو ضروري بس لما قمت أمشي وأرفسه بوجهه وللا بطنه في الظلمة ( قطي رمادي ) أو يفاجئني من الخلف مرة وحدة وآنه قاعدة أطبخ وأرشه بالماي من الخوف... قلت لاااااااااه ...يبيله... طوق بجرس....!

شلون تلبسها إياه... حاول تدللها وتغنجها حك تحت أذنها من صوب اليمين أو اليسار وحاول تمسح عليها بنعومة وتحرك أصابعك أو تحك رقبتها من ورا بأظافرك شوي شوي.. ولما تعطيك ظهرها علشان تكمل .. حاول تنزل بأظافرك من تحت أذنها ليتحت فكها و( خلك ماسك الطوق باليد الثانية ) وتلقى الطوق من يد لليد الثانية من تحت فكها من غير ما تحس وبعدين سكره من فوق الرقبة .. ونادها باسمها بلحن معين علشان تتعود على اسمها وعلى صوتك.
وحاول تاخذ طوق على مقاس رقبتها علشان مهما تسوي ما يطلع من راسها..
اذا حاولت تلبسها الطوق بالغصب أولا راح تعافر ويمكن تشمخك و تعضك... ثانيا راح تخاف تقرب يمك مرة ثانية... ثالثا إذا لبستها الطوق راح تكون نفسيا مو مرتاحة وتلاقيها بس تحك الطوق علشان تطلعه..
فليش الغصب ؟؟ باللين والهداوة كلشي حلو..

بالنسبة حق انها تتعود عليك.. كل ما حطيتلها أكل دللها وامسح على جسمها وانت يم الصحن.. أو حاول توكلها بايدك ترى راح تلحقك كل مكان.. حتى اذا كنت بغرفتك واهي برة راح تلاقيها عند الباب نايمة تنطرك .. وعلى العموم القطط بسرعة تصادق صاحبها وتتعود عليه.. والأفضل انك لما تنام بالغرفة تدخلها معاك وتكون فرشت لها بطانية سميكة من القطن على الأرض وترد باب الغرفة ( ما تسكره.. بس ترده ) علشان ليبغت تطلع بالليل للحمام عزك الله .. أو بغت ماي ترى حتى القطط تعطش عقب النوم. جذيه راح تلاقيها بالبداية تماوي طول الليل علشان انت تقوم.. وبعدين يمكن تصعد على السرير وتشم وجهك أو تدزك بايدها.. بعدين اذا كنت صاحي قاعد بالصالة تجي تنط يمك وتلصق فيك علشان تدللها..

أدري طولت عليك بس لازم أقول تجربتي وأفيد..