[Q8 Sailer]

هلا اختي ..
بما ان انا عندي حوض واروح دايما لمحلات اسماك الزينه ..

هناك 3 انواع من الاسماك بالنسبه لأحواض السمك ..
النوع الاول هناك اسماك شرسه
والنوع الثاني اسماك اليفه أو غير شرسه .. وطبعا ماتقدرين تحطين الاسماك الشرسه مع الغير شرسه راح ياكلون بعض ..

والنوع الاخير اسماك البحر انتبهي لاتاخذين سمكة بحر وتحطينها بماي حلو )

المهم اختي بالنسبه للاكل حسب اللي اعرفه وانا اللي اطبقه كل يومين احط لهم مره فقط لا غير ...

وبالنسبه للماء دايما خليه دافيي .. اشتري مثل جهازي يصدر حراره داخل الحوض .. وان كان الحوض عندج كبير اخذي منه اثنين ...

ومو ملزومه تعرفين انواعهم اهم شي تعرفين الشرس من الغير شرس علشان لا تصير مذبحه داخل الحوض :>

حاولي انج تنظفين الفلتر وان كان الفلتر صغير اشتري فلتر اضافي .. افضل لج علشان تحافظين على نظافة الحوض..

ماء الحوض على حسب كل اسبوعين أو كل 3 اسابيع ووممكن كل شهر يتغير .. على حسب نظافة الفلتر وعدد الاسماك اللي داخل الحوض ...

وانا اللي اعرفه واللي جربته بنفسي واكتشفته ان اذا كان داخل الحوض اضاءه(ليت .. لمبه) طفيها لأنها تلوث ماء الحوض .. (ممكن البعض يقول شلون وغريبه) لكن انا اكتشفت هالشيء من طفيت الاضاءه الحوض دايم عندي نظيف الحين بيصير له اكثر من شهر وريحة الماء مافيها أي شي ولله الحمد ..

واسف على الاطاله يا اختي بس حبيت اشاركج بمعلوماتي واللي اعرفه وان كان في أي خطأ بمعلوماتي اتمنى احد من الاعضاء يصححها لي ..

والسلام عليكم ورحمة الله وبركاته )