[غزل]

ذهبت البارحه لمحل للطيور ... وأخذت معي كرواني (( وكان بدون قفص ))

المهم الهدف من الروحه اني حابة اعرف جنس طيري ذكر ام انثي

بعد السلام سئلته - هالكوكتيل شنو نوعه ؟

- انثي

- اي بس اهو بعده صغير شلون تاكدت

- يستحيل يكون صغير هذى عمره اكبر من اربع اشهر

- شلون هذى عمره شهر وثلاث اسابيع !!!

- ما يصير لان البقع البرتقالية ما تطلع إلا بعمر الاربع اشهر (( واثق جداً من كلامه ))

- ما ايصير انا يوم اشترية عمره ثلاثة اسابيع وحتى ريشه كان داخل القشور وكان ما ياكل إلا سيرلايك وبالابره !!!

- انتي متاكده ان جسمه كان عودان وشلون عرفتي انه ثلاثة اسابيع

- لان بالنت حاطين عمرهم بالايام وسويت مقارنه واكتشفت ان عمره ثلاثة اسابيع او 23 يوم بس

- النت كله خرابيط هذى ناس تحط اي شي وانتو تصدقون .

- بس فيهم ناس خبراء

- كله خرابيط وما عليج منهم

- انزين الحين انت متاكد انه انثي وشلون تاكدت من البقع

- لا بس ملامحه تبين انثي وبعدين ليش هلون تقصين اجنحته شفتي شلون خربتيهم

- عيل شلون اقصهم انا قصيت التحتين وخليت الفوقين عشان التشكيلة ما تختبرب

- بالعكس لازم تخلين السيف ( هذى كلامة ) والحين لازم تنقفين الريش (( يقصد اسحبهم ))

- لا حرام بيتعور

- كيفج عيل خليه شهر وثمانية اشهر عشان يطيحون ويرجع يصف

ــــــــــــــــــــــــــــــــــــــــــــــــــــــــــــــ

يا جماعه هذى الكلام اللي صار بيني وبين محل الطيور البارحه وحبيت اتاكد من صحته وعلى فكرة انا رفضت انه يشيل الريش بالنتف وقلت له لو يظل طول عمره هلون ولا يتالم

وشغله ثانية قالها لي ان الكروانات طيور غير وفيه لاصحابها ومهما عملنا لها فانها تتحين الفرص لتهرب ... بعكس البلابل (( وهذا على كلامه هو )) وان الانثي تتكلم بعكس الذكر اللي بس يصافر بالتقليد ومن كلامة ان من ايام باع نثية كانت تقول السلام عليكم قلت له نفس الببغاء قال واحسن وبعتها بـ 110 دينار - مع انه نفسه قال لخالتي ان الانثي ما تتكلم بس تصافر خفيف

اش رايكم بكلام الخبير مع العلم ان هالمحل قديم جداً جداً من وعيت وانا اشوفه وما شاء الله - الله يبارك له فيه المحل كل ماله يتوسع

وبالنهاية طبعا ما جادلته لانه كان وايد واثق بكلامة ... يعني المجادلة راح تكون عقيمة فاخذت كرواني ومشيت