[nasser1430]

(( تـنـبــــيـــــه ))

إخواني وأخواتي أعضاء و زوار المنتدى الطيب

السلام عليكم ورحمة الله وبركاته

اليوم أنا رحت لسوق الطيور ( العزيزية ) عندنا في جنوب الرياض ... أخذت فره على المحلات

المهم دخلت أحد المحلات فيها مقطوعين الذكر ( البنقال ) .. لا كثرهم الله ... واللي شفته والله العظيم قهرني ..... تدرون كيف يروضون أو يولفون الطيور .

والله العظيم شيء يقطع القلب ..... طريقتهم كالتالي : -

1 - الطير يخطفه خطف من القفص أو الا ستاند .. كأنه يشيل شجره من جذوره ... والطير يجاعر حسيت إنه بتجيه جلطة أو إنهيار عصبي . حسبي الله عليه .
2 - يمسك الطير من رجوله ويعصرهم عصر .. كأنه بيسوي منه عصير برتقال ، وبعدها يخضه خض مهوب طبيعي أبداً .... كأنه بيسوي منه ( ميلك شيك ) ... بالعربي ( حليب مخفوق ) .
3 - إذا جاء ينزله على القفص أو الاستاند بعد هالحركات القذره ... يمحط به محط الويل لدرجة إن الطير كأنه يقول ... اللهم إني لا أسألك رد القضاء ولكن أسألك اللطف فيه .. سلمت أمري لله .
4 - يستعملون بالخفاء بدون ما يشوفهم إلا رب العالمين ( البنج ) نعم البنج اللي يستعمل عند دكتور الاسنان ... علشان اللي بيشتري الطير ... يقول يا حليله ... ما يدري إن الطير مهوب من كيفه إلا والله من اللي شافه ..
5 - ( خارج الموضوع ) ... الطير طبعاً يشتريه اللي ما يخاف الله مثلاً بـ ( 500 ريال ) بتقولون رخيص ، صح عليكم رخيص لأنه يجاعر و ما أحد بيأخذه ولا ( 1 ريال ) لأنه صاير صفارة إنذار من كثر الجعير والصياح اللي تفقع الاذن ... بس يطبق عليه ما ذكر آنفاً ... ويبيعه بعد كذا بأقل شيء ( 2500 ريال ) ... حسبي الله ونعم الوكيل ... الله لا يربحهم ،،، الشغلة ما تأخذ منه إلا يوم أو يومين وإذا الطير أعصابه قويه ثلاثة أيام بالكثير .

وباقي الطيور تقول إنها فاقده الاحساس ... وداخله جو غير الجو اللي حنا فيه ... بالعربي إتبلدت يعني فصل عندها الشعور بالغير

والله ما كتب هالموضوع إلا ... (( تنبيه للي يبي يحط طيره .... أياً كان ... مكاو ، افريقي ، أمزوني ، دره ... أي كائن حي .... أطلت عليكم .... بس حبيت أحطكم بالصورة ... وانـبــهـــكـــــــم .

والسلام