منتديات تو زوو - امراض طيور الحب وعلاجها

السلام عليكم اخي باسم واختي جيهان .. في البداية أسأل الله أن يشفي طيوركم ويحفظها لكم من كل سوء .

بصراحة ما عندي خبرة في الأمراض ولا العلاج بس نفسي أساعدكم باللي اقدر عليه ، واللي استنتجته من كلام الخبراء انه طيور الحب مشاكلها كثيرة وغالبا ما تكون فجائية وغير معروفة الأسباب .

وزي ما د/أحمد مرة قال انه طيور الحب طيور قوية ولها قدرة عالية في إخفاء المرض وما يظهر عليها إلاّ بعدما يأخذ منها كل مأخذ وبسببها أحيانا تموت فجأة وننصدم بموتها رغم انها كانت تبدو في أفضل حال !

عشان كدا لازم تنتبهلها من البداية وتراقب تصرفاتها عشان تكتشف لو بتعاني من شي من اولها وتسهل معالجتها قبل ما يتفاقم المرض ويصعب العلاج .

المهم انا ماراح اتكلم بمنظور علمي لأني مالي في هالسوالف بس هقولك على الشيء اللي عملته مع طيوري لما مرت في حالة مشابهة نوعا ما من اللي عليها طيرك .

بس لاحظ قبل أي شي لازم تكون عارف على الأقل الظروف اللي أدّت للطير أن يعاني من هذه الحالة :

- هل تعرض لتيارات هوائية باردة ؟

- أم الطعام والمياه كانت ربما غير نظيفة ؟

- أو هل مكان تواجده غير مريح وما يعطيه حقه ياخذ كفايته من النوم ؟

- أم هل القفص ربما يكون قد غزاه الفاش !

- أم ربما يكون مصاب بخلل معدي او بالإسهال – أعزّكم الله – فماله شهية ياكل ؟!

أم .. أم .. أم ... ؟؟؟!! وما إلى ذلك ... لأنك اذا عرفت السبب راح يسهل عليك تحدد نوعية العلاج .

وبالنسبة لعصفورة حبي يوم ما اشتكت من الخمول ونفشان الريش وكان فعلا في حشرجة في صوتها وهيا تتنفس فاتحة فمها .. بس وقتيها كانت جايبة 8 بيضات وطوّلت كثير في وضعهم فيمكن دا يكون أثّر عليها وخلاها تتعب ، فواحد من الخبراء الله يجزيه بالخير نصحني أحطها في مكان هاديء ودافي واحط في مويتها قطرات من الليمون والعسل .. بس للأسف ما رضت تشربه .

ولأنهم طيوري الحمدلله جدا أليفين معايا وعندي خبرة لا بأس بها في العلاج الطبيعي .. فاخذتها في يدي وعملت لها مساج خفيف بالضغط الناعم على أطراف اجنحتها ورجليها مدة دقيقتين ثلاث مرات في اليوم لأنه دا بيساعد في تنشيط الدورة الدموية في اجزاء الجسم ويعيد النشاط والحيوية .......

عارفة كلامي مش مقبول ولا منطقي والكثير ما راح يتقبله .. بس دا اللي عملته ومش عارفة اذا طيوركم هتتجاوب معاكم ولا لأ ! بس حبيت أعرضلكم تجربتي اللي عملتها معاها والحمدلله بعد فضل الله ربنا برحمته عافاها ورجعت افضل من الأول وبدون أي فيتامينات ولا أدوية .

أخي باسم حاول الحين تحطلها في المشربية العسل والليمون وخلي محيطهم اللي هما فيه صحي نظيف هاديء ودافي وحسسه بحنانك وحبك وأتمنى ربنا يشفيه ويعافيه لحد ما ربنا يسهّل ويرد علينا احد من الخبراء بمنطق علمي ..

وياريت تحاول قدر الإمكان تذكر كل التفاصيل والأشياء اللي بتشك انها يمكن تكون سبب معاناته عشان يقدروا يشخصوا المرض ويفيدوك بالعلاج المناسب .

وفي إنتظار د/أحمد توفيق أن يلقي الضوء قريباً على هذا الموضوع المهم .

والمعذرة على التقصير والإطالة .