|
قطتي و البوكس
السلام عليكم
قطتي عمرها سنه لما ابي آخذها عند الدكتوره البيطريه او لما اروح عشان احممها احطها في البوكس وهي اول ما احطه قدامها اكون فاتحته وحاطه لها البوكس قدامها على طول تدخل فيه وتقعد كأنو عاجبها المكان لكن لما اغلق البوكس يجيها جنونها تقعد تماوي كأنها تبكي وتطلع ايدينها من بين حدايد باب البوكس وتعضه بأسنها بقوه وانا ما اخليها تعضه اخاف ينكسر سنها وتتقلب في الصندوق اقعد انا اهديها اناديه بصوت هادي وتسكت وبعدين ترجع تنجن ما ادري كيف اخليها تتعود عليه ومره دخلتها السياره وطلعتها من البوكس وبرضوا تكون خايفه لما تتحرك السياره ما ادري ايش اسوي فيها والمشكله انو المسافه تكون بعيده لما اروح احممها او اوديها عند البيطري وهي تطول على هالحاله طول الطريق تنجن تكفوووون انا الحين بدويها احممها وما ادري كيف اخليها ماتسوي هذي الحركات لان من جد قلبي يتقطع لما اشوفها كذا :( |
رد: قطتي و البوكس
عااادي كل القطط تكره الاماكن المغلقه
بس انتي حطي عنده شي مثل قطعة دجاجه لعبه اي شي وجربي او غطي راسها اذا ركبتي السياره او نفس السله حطي هليها شي عشان ما تشوف الطريق تراني مجربه مع بساستي بس بدون سله كنت احط يدي على عيونهم وبس ولايكن صوت السياره قوى :) اتمنى من الاعضاء مساعدتك والمتميزين :) |
رد: قطتي و البوكس
طيب لو ما احطها بالبوكس عادي
هي يعني لما اشيلها ماتحاول تنزل او تتنرفز يعني عادي عندها يعني ابي اشيلها بيدي وانا في السياره اخليها بخضني عادي ولا لا ؟ ومشكوره اختي على ردك ^.^ |
رد: قطتي و البوكس
تعالي شوفي اللي عندي امس شافتني امسح البوكس شردت ماعاد شفت وجهها
ولو تشوفي ايش يسون بالسيارة مياوووووووووووووووو بجميع الطبقات ويندسون تحت المقاعد والاثى تبخ ع الذكر مع انهم عايشين سوا وربي يجيني صداع . حاولت بشتى الطرق اعلمهم مافي فايدة انتي عادي اذا طلعتي السيارة فكي البوكس وخليها بحضنك وامسحي ع راسها وكلميها بهدوء انا كذا اسوي واحسهم شوي يهدون. موفقة |
رد: قطتي و البوكس
هل الصندوق يوجد به نواسه (لمبا صغيرا)
لو لم يكن موجود يرجى احظار ووضعه بالبوكس (الصندوق) ورديلي خبر يا اخت |
رد: قطتي و البوكس
انا روزتي تخاف من السياره ياقلبي عليها قلبها بيطلع وخاصه اذا مرت سيارات اصواتها عاليه تخاف وترتبك
فاانا افضل البوكس تجلس فيه حتى نوصل المكان حتى هيا كانت ف البدايه تحاول تطلع منه لكن يوم شافت الوضع مايخارج صارت تجري وتدخل وتلتم ع نفسها |
رد: قطتي و البوكس
وعليكم السلام ورحمة الله وبركاته حياك الله أغلبنا يشتكي من ذا الشي وما نوصل للبيطري إلا وروسنا مشلوخة من المياااو مياااو :( وبالطقاق الين يقدر يطلعها من الصندوق مثل أفلام كرتون :p وبمجرد ما يخلص من الكشف تروح للصندوق مثل البرق وتدخله ولسان حالها يقول ( نار القفص ولا جنة البيطري ) :D هذا شي طبيعي لأن البسس ما تحب تنحبس خصوصا إذا كانت تسرح وتمرح وبعدين دخلناها للصندوق .. في غرفة وش كبرها ما يحبون ينحبسون فما بالك بصندوق نص × ربع متر والبعض يستخدم أكبر شوي أو شنطة خاصة وكلها في النهاية حبس . جتني قبل فترة هفة اروّش قطوتي في محل حيوانات لكن بعد الي شفته عندهم من قل النظافة والتعامل بقسوة :mad: حرمت وقلت أروشها في البيت أحسن وبمساعدة أحد من الأهل لأن الغالب الأعم فيهم ما يحبون الماء والي نشوفه على اليوتوب من وناسة البسس جوا الماء فهذا من النوادر :rolleyes: أما إذا كنتِ مضطرة فاحرصي يكون تنظيفها عند عيادة متخصصة تقدم ذا الخدمة وليس عند محل حيوانات لأنها تحت اشراف طبي :88: بالنسبة لي ما أأيد فكرة ترك البسس برا الصندوق في السيارة .. ودي أسمع استغاثتهم شوي ويوجعني راسي وأجلس ألاعبهم لحد ما أوصل ولا اني أجي أحط إعلان في قسم المفقودات عن فقدي لبستي وأذكر انه مرت علي قصة بنفس ذا الشكل و ممكن تتعرض البسة للأخطار ( الدعس ـ الأذى من البسس المتوحشة ـ الأذى من البزارين المتخصصين في ملاحق البسس ورجمهم بالحصىى ـ السرقة ويمكن ربي يطيحك في أحد يخاف الله ويحط إعلان في قسم المفقودات وممكن يمل منها ويعرضها تبني :( للأعضاء أو لجمعية القطط وما أصعبها من لحظات لما تتأكدين ان بستك عند أحد ويجحد وجودها ويقعد يراوغ :mad: ) وبصراحة ما ربينا بسس إلا لأننا نحبهم ولو فقدناهم كأننا نفقد جزء من حياتنا :( أنا حالياً في طور التجربة ومن فترة كمحاولة مني في حل سالفة الميااو وسط الصندوق ولسا ما انتهيت منه لأته يبي له صبر حتى يروح من بال البسة ان هذا الصندوق للحبس فقط وهو إني فرشت أرضية الصندوق بقطعة مربعة ماصّة تستخدم تحت المرضى وتباع في الصيدلية وسويت فتحة في الأعلى وعلقت لعبة تحبها البسة بخيط مطاط وتركت الصندوق مفتوح ودايم في وجهها في الروحة والجيّة ( ومو في المخزن بحيث ما أطلعه إلا إذا بغيت أوديها أي مكان ) يعني تقدر تدخل الصندوق وتطلع على راحتها وأحيانا يعجبها الوضع وتنام فيه أو تتخبى فيه وقت اللعب والتفحيط وخليته جزء من فترة اللعب بيني وبينها بحيث أجلس جنب الصندوق وأناديها فتجي وتدخل من نفسها لأنها تعودت عليه وإذا دخلت تلعب أقفل الباب نص قفله شوي وبعدين أفتحه طبعا طول ذا الفترة وأنا ألاعبها من خلال الشبك والفتحات الجانبية كم يوم على ذا الحال وبعدين أسكره بشكل كامل وأسوي نفس الشي وكل مرة أزيد في مدة تواجدها فيه مع التأكيد على عدم مغادرة المكان حتى تحس البسة بالراحة ;) واذا ضبطت الطريقة معك أو مع أحد من الأعضاء قبلي عطوني خبر :12: بالتوفيق اختي |
رد: قطتي و البوكس
فكره حلوه اختي الدلع ماقصرتي يعطيك الف عافيه حبيبتي ...
اما بالنسبه للبستك ميزنو انا احس هي تخاف بزياده علشان التحميم انا ابدا ابدا ما انصح البسس يروحون مكان للعنايه او التحميم انا افضل فالبيت معك انت علشانها متعوده عليك وراح يخف عندها الخوف شوي شوي المقاطع فاليوتيوب انو البسس تحب التحميم صدق تصير مع اغلب البسس انو مع الوقت يحبون التحميم بس فيه نقطه علشان تخلينها تحب الحمام اهم نقطه تبدين تحممينها وعمرها صغير مو وهي كبيره علشان البسس الصغار يتعودون بسرع بس الكبار صعب شوي وثاني شي وهو الأهم لاتحممينها تحت الدش او الرشاش او تحت البزبوز او صنبور المويه عبي مويه دافيه وجيبي صحن او كاس وصبي عليها شوي شوي ولمسيها واذكري اسمها وحاكيها شوي شوي بللي جسمها كله بعدين حطي الشامبو بسرعه وافركيها وبعدين صبي عليها بنفس الطريقه صدقيني مع الوقت بتتعود وبيصير عادي بس احرصي وقت التحميم خلي الجو هادي ولا يدخل معك احد مزعج ممكن يوتر البسه علشان لما تكثر الاصوات تتوتر وممكن تحاول تهرب اهم شي المرات الاولى ماتسمع الا صوتك انت بس علشان تعرف انو شي مو خطير ومايحتاج الخوف ... بس فالمحلات الله لا يوريك اول شي ازعاج ثاني شي مكان مو مكانها اللي متعوده عليه والبسس ماتحب التغيير تحب مكانها وبس والشخص اللي بيحممها ماتعرفه واكيد بيكون مايهمه ويحممها بكل خشونه وطبعا بالرشاش ومدري ايش يعني ما ألومه اذا قام يماوي وينهبل ...وعندي فكره ممكن تفيد حطي فالبوكس البخاخ اللي يحبونه البسس او ذري من العشبه نفسها وبكذا راح يهدون وقت الطلعه ان شاء الله اكون افدتك وافدت الجميع سوري سوري على الاطاله بس حبيت افيدك ...ف |
| جميع الأوقات بتوقيت GMT +3. الساعة الآن 11:06 PM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو