ماني قادر اروضه
 

السلام عليكم اخواني

انا اشتريت كاسكو غيني جعر اول ساعه بس بالبيت بعدين خلاااص ما عاد جعر ابد ونسيت صوووت الجعيرر

هو جوا القفص اعطيه الاكل اول مره يحـذفها الثانيه يحـذفها الثالثه يشمشم شوي ويتذوق بعدين ياكلها حاولت اني اطلعه برى القفص مو راضي يطلع ابد ويعض بس بدوون جعر لما احاول امسح على راسه يرفض ويعض بدون جعر

امسح على منقاره بالفول السوداني عادي ما يقول شي المشكله الحين انه بادي ينتف ريشه والعلاج حق الريش ماني محصله رحت لطبيب بيطري قال هذا يجي من سوريا ومنقطع من السووق الحبيب يقول لي حط شويه ديتول شرايكم :( خفت من هالنقطه صراحه لانه يقول فيه فطريات باديه تطلع بالرريش


الحين ابي اروضه عشان اقدر اغسله باي شي عن الفطريات ماني قااادر شرايكم انتم

طبعا جربت طريقه التجويع ما نفع معه عنييييييد

رد: ماني قادر اروضه
 

هـلآ بلحربي يآمرحبا اول شي مبروك عليك الطير واذا الطير جديد عندك لابد انك تتركه يتعود عليك ويتعود على آهل البيت ويتعرف عليهم صعبه تشتريه وتروضه بعد يوم او يومين لانه جديد وبيخآف شي طبيعي علقه في مكان مرتفع وآتركه اقل شي سبوع ثم ابدا بترويض وافضل طريقه لترويض هي انك تطلعه من القفص بس تتآكد ان جناحه مقصوص تطلع الطير على استاند وترش الطير في بخاخ مويا ويكون المويا دااافي ثم تبداء بلمسح عليه وتحك له لان المويا والاستحمام يمتص توتر الطائر والاهم من ذالك ياخوي كله الهدؤؤؤ والصبرر اذا اقبلت على طيرك او جيت تمسح عليه لا تكون حركة يدك سريعه كذا تفزع الطائر لزم تكون هادى معه

بنسبه للفطريات والنتف الطير يشعر بحكه بجلده ويحك وينتف بنسبه للبخاخ انت بالرياض ابيك تروح لمحل افضل محل تتواجد فيه ادويه وفيتامينات لطيور غير عن البيطريين المحل اسمه الحياة والطبيعه بسوق الحمام على الشارع الرئيسي لون لوحة المحل سوداء فيه كل شي وقل له يعطيك بخاخ بلجيكي اسمه k.okiki . ممتاز جداً جداً لمشاكل الفطريات والحك والنتف والحساسيه يقتل جميع البكتيريا والفطريات ويزيل القشر بس انتبه ترى البخااخ مركز جداً جداً وغير عن كل البخاخات يعني لرشية الطير لا تكثر ومره اومرتين بل اسبوع كافيه مع الترويش والاستحمام وتعريض الطائر لشمس في بداية طلوع الشمس او قبل غروبها بساعه وموفق خير تقبل تحياتي .

اخوك ابو شيخه

رد: ماني قادر اروضه
 

حبيب قلبي ابو شيخه والله يعطيك العافيه

بالنسبه للطير الان له اسبوع بس مو راضي يطلع من القفص ابد

وهو يصفر الصبح كل يوم يقعدني للدوام هههههههه احسه موقت على الدوام وعمره ٥ شهور الى ٦ شهور عيونه باديه تدخل على الرصاصي هادي مرررررررره بس موب لعوب كلش

رد: ماني قادر اروضه
 

هلا اخوي بالنسبه الي الترويض فيه شروط وقواعد من اول الشروط ان لازم الطير يتاقلم وهذا يحتاج لفتره من شهر الي 40يوم علاشان يهدىء يجب وضع قفص الطير على ارتفاع مترين وبزاويه وبعيد عن المكيف يعني مايكون في وجهه التكيف البارد الاهتمام بالنظافه اليوميه وتغير الماء وتنويع الاكل ترك الطير ينام من وقت مبكر من غروب الشمس كي يستيقظ مبكرا ونشيط بعد فتره التاقلم الطير راح يتعود ويتاكد ان مافيه اي احد راح يضره مشكله الافريقي انه حساس زياده وحذر في نفس الوقت ولاكن مع الصبر وطوله البال الامور راح تستعدل انا نصيحتي لك انك تخليه على راحته اهم شيء اكرم الطير بالاكل ولاتظغط عليه .اما بالنسبه انه ينتف الريش ان فته وهو ينتف الافضل انك تنزل صور للطير
.

رد: ماني قادر اروضه
 

اخوي فوزي بالنسبه للنتف فهو ينتف بشكل بسييييييط جدا انا خايف انه يزيد مع الوقت خصوصا لما خوفني البيطري يوم قال فيه فطريات وحاول تخلص منها باسرع وقت ممكن :( فانا من هاللحظه وانا بصراحه خاااايف